DVG ta tuma liderazgo di maneho di salud mental na Aruba

ORANJESTAD – Maneho y coordinacion di salud mental y cuido di adiccion na Aruba lo wordo incorpora structuralmente den Directie Volksgezondheid (DVG). Como parti di e cambio, presidencia di Stuurgroep GGZ ta pasa di Ministerio di Salubridad pa DVG.

Meta di e cambio ta pa garantisa mas continuidad y pa mantene maneho di salud mental ancra den sistema di salud publico, independiente di cambionan politico. DVG lo keda encarga cu presidencia di Stuurgroep GGZ y coordinacion entre e diferente instancianan cu ta forma parti di e cadena di cuido.

Cu e structura nobo, Aruba kier fortalece colaboracion entre e organisacionnan envolvi y crea un sistema unda prevencion, deteccion trempan, tratamento, recuperacion y reintegracion social ta conecta miho cu otro.

E enfoke principal ta pa garantisa continuidad di maneho y un sistema di salud mental sostenibel y accesibel, cu bienestar di paciente como prioridad.