Colombia y Merca kier fortifica cooperacion y comercio

WASHINGTON – Vicepresidente electo di Colombia, José Manuel Restrepo, a reuni cu secretario di Estado di Merca, Marco Rubio, pa discuti e futuro di e relacion entre ambos paisnan. Segun Restrepo, un di e puntonan principal tabata cu cooperacion cu Merca lo sigui basa riba respeto total pa soberania nacional di Colombia.

Durante e reunion, e dos banda a expresa interes pa fortalece cooperacion den seguridad, lucha contra cultivo ilegal di droga, reforsa Fuerzanan Militar y amplia comercio y inversion. Colombia tambe a manifesta interes pa forma parti di e programa Shield of the Americas.

Marco Rubio a describi e reunion como fructifero y a bisa cu Merca ta spera traha hunto cu e proximo gobierno di presidente electo Abelardo De La Espriella pa amplia cooperacion economico y di seguridad. Analistanan ta bisa cu un relacion mas estrecho entre ambos paisnan por trece beneficio comercial pa Colombia.