Pieters(PPA): Fase dos di reforma pa maestro ta sin claridad

ORANJESTAD – Parlamentario Eduard Pieters (PPA) ta bisa cu Gobierno no a duna suficiente claridad tocante Fase Dos di e reforma educativo, particularmente e plan pa mehora e posicion y desaroyo profesional di maestronan y docentenan.

Segun Pieters, hopi atencion a bay na e mehoracion salarial di Fase Uno, pero te ainda no ta cla con ta bai traha e siguiente fase. El ta cuestiona unda e plan concreto ta pa entrenamiento continuo, evaluacion, guia y oportunidad di crecemento profesional pa maestronan.

Pieters ta opina cu un aumento salarial so no ta suficiente pa mehora calidad di enseñansa. Segun e, ta importante pa tambe inverti den guia, motivacion, evaluacion regular y un sistema cu ta stimula maestronan pa sigui desaroya nan mes.

E parlamentario a bisa cu PPA a haci diferente intento den Parlamento pa haya mas informacion y dialogo cu e Minister di Enseñansa, pero cu e partido no a ricibi e apertura cu e tabata spera.

Pieters tambe a haci un yamada na e minister pa reuni cu stakeholder manera SIMAR, SEPPA y directivanan di scol, pa asina traha hunto riba e siguiente fase di e reforma educativo.