Aruba ta conkista titulo Latinoamericano Junior League 2026

ORANJESTAD – Aruba a logra un logro historico atrobe den baseball jubenil. Den final di e Torneo Latinoamericano di Junior League, Aruba a vence Nicaragua y a corona como campeon regional, garantisando su lugar den e 2026 Junior League Baseball World Series na Merca.  

E victoria ta marca un otro capitulo importante den historia di baseball Arubiano. Despues di un torneo fuerte, e seleccion nacional a logra supera Nicaragua den e final pa reclama e campeonato y gana e derecho di representa Latinoamerica riba e scenario mundial.

Cu e resultado aki, Aruba lo enfrenta e mihor ekiponan hubenil di mundo den e Junior League Baseball World Series, unda e hoben talentonan lo tin e oportunidad di mustra nan capacidad contra campeonnan di otro regionnan.

E triunfo ta un motibo di orguyo pa Aruba henter y un recompensa pa e dedicacion di e hoben peloteronan, nan entrenadornan, bvoluntarionan y famianan cu a contribui na e exito aki.

NoticiaCla ta felicita e seleccion di Aruba cu nan logro  extraordinario y ta desea nan hopi exito den e Mundial di Junior League. Potret cortesia 297 Sports.