Aruba y Boneiro ta enfrenta otro den semifinal di Little League Caribe

SABANA GRANDE, Puerto Rico – Aruba y Boneiro a logra clasifica pa semifinal di Campeonato Caribe di Little League y lo enfrenta otro awe pa un puesto den e final di e torneo.

E campeonato di e aña aki ta desaroyando na Sabana Grande, Puerto Rico. Corsou no ta participando, pasobra Little League International a duna e isla un pase directo pa Little League World Series na Williamsport, Pennsylvania.

Siete equipo a participa den e torneo: Bahamas, Islanan Virgin di Merca, Republica Dominicana, Puerto Rico (Yabucoa), Puerto Rico (Sabana Grande), Boneiro y Aruba.

Despues di e ronda regular, Republica Dominicana y Aruba a termina cu record di 5-1, sigui pa Boneiro y Bahamas cu 4-2. Sabana Grande a caba 2-4, Islanan Virgin di Merca 1-5 y Yabucoa 0-6.

Den semifinalnan di awe, Republica Dominicana lo enfrenta Bahamas, mientras cu Aruba lo enfrenta Boneiro. Cu esaki, tin un posibilidad cu un representante di e islanan ABC lo logra un puesto den Little League World Series na Williamsport.