Arubiano escogi den MLB Draft pa Los Angeles Dodgers

ORANJESTAD – Aruba tin un motibo nobo di orguyo den mundo di beisbol. Max Irving, cu tin su tata Maximilion Irving y mama Sherry ambos di Aruba, a wordo scogi pa e Los Angeles Dodgers den e 18de ronda (553 seleccion general) di e Major League Baseball Draft 2026.

Cu esaki, Irving ta bira otro atleta cu raiz Arubiano cu ta logra un paso importante rumbo pa Grandes Ligas, confirmando un biaha mas e reputacion di Aruba como un criadero di gran talento den beisbol internacional.

Irving yega na e draft despues di un temporada extraordinario cu Montverde Academy, unda el a batea pa un impresionante promedio di .474, acumulando 37 hit, 12 doble, 7 homerun, 28 careda impulsa, 38 careda anota y 14 base roba. Su aporte tabata decisivo den guia e Eagles na nan prome campeonato distrital desde 2023.

Pa wordo escogi den e MLB Draft ta representa un logro cu solamente un cantidad limita di beisbolistanan ta logra alcanza. Irving lo awor negocia cu Los Angeles Dodgers tocante un contrato profesional prome cu e fecha limite pa firma vence.

Si no yega na un acuerdo cu e Dodgers, Irving lo sigui cu su compromiso pa studia y hunga beisbol na University of South Florida, manteniendo su elegibilidad pa un futuro MLB Draft.

E seleccion di Max Irving ta fortalece e legado di Aruba den baseball profesional y ta sirbi como inspiracion pa e siguiente generacion di hoben beisbolistanan cu ta persigui nan soño di yega Grandes Ligas.