Aruba Regatta ta reuni nabegantenan di Caribe na Surfside

ORANJESTAD – Aruba a biba un fin di siman yen di deporte acuatico y ambiente caribeño cu e celebracion di e di 16 Aruba International Regatta, organiza pa Aruba Regatta Foundation. Despues di un apertura exitoso, diasabra a marca e prome dia completo di competencia, cu emocion y accion riba lama dilanti di Surfside Beach.

Nabegantenan for di Aruba, Boneiro, Corsou y otro paisnan den region a participa den dos dia di carrera, hunto cu un celebracion di e cultura y comunidad maritimo di Caribe. E evento tabata habri pa participante di tur nivel, for di muchanan cu ta competi den clase Optimist te tripulacionnan experimenta di yate.

E competencianan a inclui diferente categoria manera Optimist, SailQube, F11, Beachcats, Sunfish, Laser, Yacht Racing, Yacht Cruising, Yacht Live Aboard, Multihull y, pa prome biaha, Wingfoil.

Un di e atraccionnan mas aprecia di Aruba Regatta tabata e tradicional competencia di Miniatuurboot, organiza den colaboracion cu Stichting Rancho. E botonan chikito traha na man a forma parti importante di herencia cultural di Aruba y ta sigui encanta tanto mucha como adulto.

Riba tera firme, e Regatta Village na Surfside Beach a forma e centro di actividad. Aki participante y bishitante por a registra, disfruta di musica, cuminda, bebida y diferente actividad social bou di e gran carpa. Diabierna anochi e programa a cuminza cu un encuentro social cu bebida, cuminda, musica y oportunidad pa haci contacto.

E competencia riba lama a sigui durante diasabra y diadomingo, cu centenares di bishitante y amante di deporte nautico disfrutando di un di e eventonan maritimo mas importante di Aruba.

Fotografo Noel Werleman a captura diferente momentonan impresionante durante e prome dia di competencia.