Trump a interveni; FIFA a suspende castigo di Balogun di Merca

SEATTLE – Presidente di Merca, Donald Trump, a comunica personalmente cu presidente di FIFA, Gianni Infantino, prome cu FIFA a tuma e decision extraordinario pa suspende e castigo di un partido impone na delantero americano Folarin Balogun. E decision ta nifica cu Balogun lo por hunga den e partido di octavo di final contra Belgica.

Balogun a ricibi un carchi cora den e victoria 2-0 di Merca riba Bosnia y Herzegovina. Segun e reglamentonan normal di FIFA, un carchi cora directo ta trece un suspension automaticamente di un partido.

Sinembargo, FIFA a haci uso di un articulo special den su Codigo Disciplinario cu ta permiti suspende e ehecucion di un sancion den circunstancianan excepcional. E carchi cora a keda vigente, pero e suspension a wordo suspendi, permitiendo Balogun participa den e partido.TRUMP A PIDI INFANTINO PERSONALMENTE

Segun varios medio internacional, Trump a pidi na Infantino personalmente pa FIFA revisa e caso. Despues di e decision, e presidente americano a gradici FIFA publicamente.

E decision a provoca hopi reaccion na Belgica. Federacion Belga di Futbol a bisa cu nan tabata surprendi pa e decision y cu nan ta analiza e posibilidat di tuma accionnan legal, argumentando cu e medida no ta bay hunto cu e reglamentonan normal di Mundial.

Entrenador di Merca, Mauricio Pochettino, a yama e decision un victoria pa "etica y integridad", afirmando cu e carta cora nunca mester tabata wordo duná. Balogun, cu tin tres gol den Mundial, ta considera un di e arma ofensivo principal di Merca.

E caso a habri un debate internacional tocante e independencia di FIFA y e posible influencia politico riba decisionnan disciplinario durante Mundial 2026.