Aruba y Santander ta fortalece cooperacion comercial

ORANJESTAD – E vuelo directo entre Bucaramanga y Aruba ta sigui habri oportunidadnan nobo pa comercio, turismo y inversion. Esaki ta resulta for di un mision comercial cu Gobierno di Santander, ProColombia y diferente organizacionnan empresarial y medico ta llevando a cabo pa fortalece e relacion economico entre e departamento colombiano y Aruba.

E mision ta reuni empresario, representantenan di gremionan y institucionnan di salud cu e meta di crea alianza comercial, identifica oportunidadnan di negoshi y amplia e presencia di productonan y servicio di Santander den mercado arubiano y den resto di Caribe.

Segun e organizadornan, e conexion aereo directo no solamente a mehora conectividad entre e dos destinacionnan, sino tambe a habri un caminda nobo pa exportacion, atraccion di inversion y intercambio comercial.

Un di e sectornan cu por beneficia mas ta turismo medico. Hospitalnan y centro medico na Santander ta mira Aruba como un mercado importante pa paciente internacional cu ta busca tratamiento specialisa. Cu e vuelo directo, paciente y nan acompañantenan lo por viaha cu mas facilidad y cu menos tempu di trayecto.

Ademas di salud, e mision ta enfoca riba exportacion di productonan agroindustrial, cuminda procesa, industria avicola, paña, calzado y servicio specialisa. Empresarionan participante ta expresa confianza cu e relacion cu Aruba lo habri porta pa nobo mercado y oportunidadnan comercial.

Gobierno di Santander ta considera cu e iniciativa ta forma parti di un estrategia di internacionalisacion pa posiciona e departamento como un centro competitivo pa comercio, inversion, turismo y servicio den Caribe.

Autoridadnan ta spera cu e ruta Bucaramanga-Aruba lo bira un puente permanente pa intercambio economico y comercial entre e dos regionnan.