A crea un 'dump' chikito riba tereno di ex Club Caribe cu ta preocupa residentenan

ORANJESTAD – Un gran cantidad di sushi di construccion a wordo laga atras riba un tereno cu ta situa patras di DIMP, riba e mes tereno unda anteriormente Club Caribe tabata ubica. E situacion a causa preocupacion cerca residente y personanan cu ta pasa regularmente pa e area, cu ta puntra con ta posibel cu un cantidad asina grandi di sushi por keda abandona sin wordo limpia.

Aruba ta depende grandemente di turismo. Miles di bishitantenan ta yega anual pa disfruta di un isla cu ta conoci pa su beyeza natural, beach limpi y un ambiente bon manteni. Ora sushi di construccion keda tira riba tereno habri, esaki no solamente ta afecta e bista, sino tambe e imagen cu Aruba kier proyecta na turista y inversionistanan.

Ademas di e aspecto visual, sushi bandona por trece otro problema tambe. E por bira un sitio pa acumulacion di sushi, atrae plaga, crea riesgo pa medio ambiente y laga un impresion cu disciplina den maneho di desecho no ta wordo respeta.

Gobierno a tuma diferente iniciativa den e ultimo periodonan pa combate e problema di sushi ilegal. Entre otro, tur siman ta wordo comunica diferente lugarnan specifico unda ciudadano y contratistanan por deposita sushi di construccion di un forma correcto. E campaña tin como meta facilita e disposicion legal di e material y reduci e cantidad di sushi cu ta wordo laga ilegalmente den diferente parti di Aruba.

Sin embargo, e caso patras di DIMP ta mustra cu ainda tin trabou pa haci. E situacion ta habri pregunta tocante e responsabilidad di esnan cu ta laga sushi atras y tambe tocante e necesidad di mas control y ehecucion di regla pa preveni practicanan asina.

Un isla limpi no ta solamente responsabilidad di gobierno. Ta un deber comparti entre autoridad, empresa y cada ciudadano. Mantene Aruba limpi ta contribui directamente na calidad di bida di su habitantenan y na e experiencia positivo cu turista ta hiba bek ora nan bishita nos isla.

Residente den e area ta spera cu e sushi lo wordo retira pronto y cu e tereno lo recupera un aspecto digno di un destinacion turistico internacional manera Aruba.