Merca ta aumenta ayudo pa Venezuela cu mas di 300 miyon dolar despues di temblornan devastador

WASHINGTON D.C. – Gobierno di Merca a anuncia dialuna un ayudo adicional di 50 miyon dolar pa Venezuela, loke ta hiba e asistencia total americano na mas di 300 miyon dolar despues di e dos fuerte temblornan cu a sacudi e pais dia 24 di juni. Segun e ultimo cifranan oficial, mas di 1.450 persona a perde nan bida, mientras mas di 3.150 a resulta herida. Autoridadnan ta spera cu e cifra di morto lo sigui subi mientras e operacionnan di rescate ta continua.

Segun autoridadnan venezolano, mas di 774 edificio a colapsa completamente of parcialmente, mientras te awor ta calcula cu cerca di 58.000 structura a sufri daño. Dialuna mainta un replica di 4.6 magnitud a move Caracas atrobe, complicando ainda mas e trabounan di recuperacion.

Personal militar di Merca ta participa activamente den e operacion di ayudo. Soldadonan di USS Fort Lauderdale a entrega suministronan den La Guaira, mientras helicopternan MV-22 Osprey y UH-1Y ta yuda cu misionnan di buskeda y rescate. Avionnan di carga C-17 y C-130 ta sigui haci buelonan continuo cu suministronan humanitario.

Gobierno americano a indica cu e operacion ta un esfuerzo di tur dependencia gubernamental, den colaboracion cu organisacionnan humanitario manera Samaritan’s Purse, Catholic Relief Services, UNICEF y Cruz Cora Internacional. Tambe tin apoyo di empresa priva, incluyendo Walmart y Global Empowerment Mission.

Ekiponan di buskeda y rescate for di ciudadnan americano manera Miami-Dade, Virginia y Los Angeles tambe a uni na e esfuerzo internacional pa busca sobrevivientenan.

E desastre natural a agrava e dificil situacion cu Venezuela tabata enfrentando caba. Autoridadnan di Merca a reafirma nan compromiso pa sigui brindando apoyo durante e proceso di recuperacion. Mientrastanto, ekiponan di rescate ta sigui buscando sobrevivientenan bou di ruinanan, den circunstancianan masha dificil.