Mama di Shannaia: “Mi ta pidi solamente un proceso husto pa mi yiu”

ORANJESTAD – Ajira Lozano, mama di Shannaia Fernandes Pedra, a haci un yamada emocional durante un conferencia di prensa dialuna mainta, unda el a pidi cu e proceso hudicial contra su yu wordo conduci den un manera husto y cu su derechonan fundamental wordo respeta. Lozano a bisa cu e tragedia a causa un sufrimentu profundo pa dos famia y cu e ta compronde e dolor cu e famia di e victimanan ta sinti. “Mi sentimentonan ta mezcla. Esaki ta un situacion hopi dificil pa dos famia. Loke nos ta pidi ta cu mi yiu haya e derecho humano cu tur hende mester tin y cu e por enfrenta un proceso husto,” el a declara.

“MI TA HOPI PREOCUPA CU E TA SIN ABOGADO”

Durante su declaracion, Lozano a expresa su mayor preocupacion: Cu Shannaia actualmente no tin e representacion legal cu el a solicita. “Mi ta sumamente preocupa paso mi yiu ta sin abogado. Mi a cria mi yiunan cu hopi respet. Nan semper tabata hoben trankil, nunca nan no a busca problema y nunca nan no tabata den conflicto cu husticia.” Segun Lozano, e famia ta sigui confia cu finalmente nan lo haya un solucion cu ta garantisa un proceso imparcial. “Mi ta kere den un proceso husto y mi ta spera cu lo tin un solucion pa tur esaki.”

“E TA DEN UN TRAUMA HOPI GRANDI”

Riba pregunta di periodistanan tocante e condicion di Shannaia den detencion na KIA, Lozano a bisa cu su estado emocional ta preocupante. “E ta den un trauma hopi grandi. Nos ta purba bishit’e tur biaha cu nos por, pero e bishitanan ta cortico y nos no por pasa hopi tempo cu dje.” Segun e mama, Shannaia ta pasando door di un situacion emocional masha dificil. “E ta den un estado hopi malo. Mi no ta kere cu e lugar unda e ta deteni, ta apto p’e, ni pa ningun otro persona. Su situacion no ta mehora.” Lozano a agrega cu, segun su opinion, e autoridadnan competente ta na altura di e condicionnan den e centro di detencion. “Nan sa con e situacion ta. Nan sa con e lugarnan ta yena y con e circunstancianan ta.”

“NOS TA SPERA CU HUSTICIA LO SIGUI SU CURSO”

Lozano a finalisa su declaracion, unda e ta reitera cu su famia no ta pidi trato special, sino simplemente cu e proceso hudicial sigui den un manera husto y cu su yiu por eherce tur e derechonan cu ley ta garantisa. “Loke nos ta pidi ta un oportunidad pa cu husticia sigui su curso den un manera husto pa tur partido involucra.”