Daal: Cruz Cora Aruba ta pidi poco pashenshi pa cu donacionnan pa Venezuela

ORANJESTAD – Director di Cruz Cora Aruba, Stephen Daal, a expresa su gratitud durante un conferencia di prensa dialuna mainta, despues cu Aruba logra manda un grupo di 10 boluntario pa Venezuela pa brinda asistencia despues di e temblornan devastador cu a dal e pais. Segun Daal, e mision a bira posible danki na un colaboracion intenso entre Gobierno di Aruba, Crisis Management Organisation (CMO), Marina Real Hulandes y diferente organizacionnan nacional y internacional. "Nos kier a gradici specialmente Prome Minister Mike Eman. Si no tabata pa su empuhe y dedicacion, e mision aki probablemente no lo a bira un realidad. Organisa un operacion internacional manera esaki ta tuma hopi coordinacion y comunicacion entre diferente instancia. Mike Eman a haci un trabou extraordinario y como Cruz Cora nos ta hopi agradeci pa su liderazgo," Daal a declara. E director tambe a elogia e trabou di CMO y di Marina Real Hulandes, cu a pone un avion disponibel pa transporta e boluntarionan. "Tabatin hopi presion, poco tempo y masha trabou pa haci. Pero al final, diferente organisacion a uni forsa y e resultado ta cu nos hendenan a yega bon na Venezuela y ta trahando pa salba bida."

BOLUNTARIONAN ARUBIANO TA YUDA CIENTOS DI PERSONANAN

Segun Daal, e grupo Arubiano ta trahando actualmente den un estadio converti den centro medico temporal, huntu cu ekiponan di otro paisnan. Nan tarea principal ta consisti di haci triage, es decir, evalua e condicion di pacientenan apidamente cu ta yega. "Solamente ayera caba, mas cu 300 persona a wordo atendi. Nos boluntarionan ta registra pacientenan, determina ken mester bai hospital inmediatamente y ken por ricibi tratamiento na e sitio mes. Nan tambe ta brinda apoyo den hospital y ta traha dia y anochi." Director di Cruz Cora a bisa cu e organisacion ta hopi orguyoso di e boluntarionan Arubiano.

CRUZ CORA PIDI PASHENSHI CU DONACIONNAN

Desde cu e desastre a ocuri, Cruz Cora Aruba a ricibi hopi yamada di personanan cu kier duna pampers, cuminda, remedi y otro articulonan pa yuda Venezuela. Sinembargo, Daal a splica cu ainda no ta e momento pa cuminsa recohe e donacionnan. "E situacion na Venezuela ainda ta evoluciona. Nos no por bisa awor exactamente kiko ta mas mester. Si nos habri pa recohe donacion awor, por ta cu nos termina cu diez container yen di cosnan cu talbez no ta e prioridad." Ademas, Aruba no tin transporte propio pa manda cargamento na Venezuela y ta depende completamente di e vuelonan cu Marina Real Hulandes ta pone disponibel. "Nos ta pidi pueblo tin un tiki pashenshi. Ora e autoridadnan na Venezuela indica claramente cua articulonan ta mas necesario, nos lo anuncia esaki inmediatamente y nos lo organiza e recoleccion y transporte."

POSIBEL MAS ASISTENCIA DEN E DIANAN BENIDERO?

Actualmente, e prome grupo di boluntario lo permanese na Venezuela durante aproximadamente 11 pa 12 dia. Daal a confirma cu no tin ainda un decision oficial tocante un segundo grupo di boluntario, pero Aruba ta sigui coordina ayuda adicional. Segun e director, un avion lo sali diarason cu ekipamento adicional pa sostene e ekipo Arubiano. Ademas, ta wordo evalua e posibilidad pa manda un grupo medico adicional for di un hospital na Aruba. "E material cu lo bai no ta solamente ekipamento medico. Tin tambe cuminda, material pa cushina y otro articulonan necesario pa sostene nos personal durante nan mision."

Mision a sali for di un peticion oficial

Riba pregunta di periodista Tito Laclé di Noticiacla, si e asistencia tabata resultado di un peticion di Cruz Cora Venezuela, Stephen Daal a confirma cu e mision humanitario a wordo inicia despues di un peticion oficial di Gobierno di Aruba. "E iniciativa aki a cuminza for di un peticion di Prome Minister di Aruba pa brinda asistencia humanitario na pueblo Venezolano den nan momento di mayor necesidad," Daal a conclui.