Na Hulanda, mas persona ta sufri di intoxicacion door di remedi pa baha peso

AMSTERDAM – Cantidad di reporahenan di intoxicacion relaciona cu remedi inyectabel pa baha peso casi a duplica den un aña na Hulanda. Centro Nacional di Informacion di Intoxicacion (NVIC) na Hulanda a ricibi 149 report na 2025, compara cu 76 na 2024.

Segun e centro, hopi di e casonan tabata relaciona cu remedi cu no a wordo receta door di un doctor. Nan ta teme cu e cantidad real ta mas halto, pasobra hopi persona no ta busca yudansa medico of no ta wordo reporta.

Specialistanan ta expresa preocupacion special pa retatrutide, conoci tambe como "Triple G", un variante hopi potente cu ainda no ta aproba oficialmente na Hulanda. Den e prome cinco luna di e aña aki, ya a wordo reporta 12 caso di intoxicacion.

Expertonan ta alerta cu compra remedi pa baha peso via internet sin supervision medico por resulta den sobredosis y causa daño serio na higado, riñon, nervionan y otro organonan.

Nan ta enfatisa cu, si un persona kier usa remedi pa baha peso, esaki mester tuma lugar solamente bou di guia di un doctor. Pa hopi hende, un alimentacion saludabel y ehecicio regular ta sigui e manera mas sigur pa perde peso.