Fondo di inversion: PPA y MEP kier mas enfoke, control y resultado pa pueblo

ORANJESTAD - Dos partido di oposicion ta comparti preocupacionnan diferente riba e Fondo di Inversion y Desaroyo, pero ta coincidi cu e placa publico mester produci beneficio real pa Aruba. Aunke Partido Patriotico Arubano (PPA) y Movimiento Electoral di Pueblo (MEP) ta mira e Fondo di Inversion y Desaroyo for di diferente angulo, tur dos fraccionnan a manda un mensahe similar durante e debate parlamentario: e fondo mester ta cla den su objetivo, transparente den su maneho y produci resultado concreto pa pueblo.

PPA

Lider di fraccion di PPA, Eduard Pieters, a enfoca principalmente riba e pregunta si e inversionnan proyecta lo traduci realmente den un mehor calidad di bida pa ciudadano comun. Segun Pieters, Aruba no por midi exito solamente den crecemento economico, cantidad di turista of entrada fiscal, si hopi famia ainda ta lucha cu costo di bida halto y preocupacionnan diario. Pieters a expresa preocupacion cu e fondo ta cubri demasiado area na un solo momento, incluyendo infrastructura, sostenibilidad, innovacion, digitalisacion y desaroyo economico. Segun e parlamentario, un fondo cu ta intenta atende demasiado tema por termina sin logra impacto profundo den ningun di nan. PPA, pa su parti, ta propone un enfoque mas dirigi riba inversion den capital humano. Pieters a argumenta cu e recurso di mas balioso di Aruba ta su pueblo, y cu prioridad mester bay na enseñansa, capacitacion profesional, tecnologia, agricultura innovativo, siguridad alimentario y salud preventivo.

MEP

MEP, representado pa parlamentario Xiomara Maduro, no a cuestiona e necesidad di inversion, pero a concentra su critica riba e manera cu e fondo lo wordo maneha. Maduro a expresa preocupacion cu e propuesta actual ainda no ta ofrece suficiente garantia di control, transparencia y responsabilidad den uso di fondo publico. Segun Maduro, Gobierno ainda no a presenta un analisis cla di e motibonan p’adres e atraso den ehecucion di proyectonan publico ni e situacion unda presupuesto regularmente ta keda sin wordo gasta na final di aña. Sin un diagnostico preciso di e problema existente, MEP ta cuestiona si un fondo nobo realmente ta e solucion correcto.

Un otro punto importante pa MEP ta e participacion di entidadnan priva den e fondo. Maduro a pidi mas claridad tocante e reglanan, posible conflicto di interes y e influencia cu inversionistanan externo por haya den e toma di decisionnan. Ademas, e parlamentario a destaca cu e ley no ta inclui KPI's, metanan concreto ni mecanismonan claro pa midi exito. Segun MEP, sin evaluacion y rendicion di cuenta, lo ta dificil pa Parlamento y pueblo determina si e inversionnan realmente ta entrega beneficio social y economico.

MEP Y PPA 

Mientras cu PPA ta pone enfasis riba direccion y prioridadnan di e fondo, MEP ta pone enfasis riba supervision y control. Sinembargo, tur dos partido ta comparti e opinion cu un fondo multimiyonario no por wordo mira como un meta den su mes, sino como un instrumento cu mester resulta den mehor infraestructura, mas oportunidad y un mehor futuro pa pueblo Arubiano.

E debate riba e Fondo di Inversion y Desaroyo ta sigui mustra cu e cuestion principal no ta si Aruba mester inverti, sino con pa haci esey na un manera cu ta genera confianza, resultado medibel y beneficio duradero pa e siguiente generacionnan.