BCA: Confiansa di consumidor ta sigui baha y preocupacion pa prijs ta crece

ORANJESTAD – E confianza di consumidornan den economia di Aruba a deteriora mas durante e promer trimestre di 2026. Segun resultado di e mas reciente Encuesta di Confiansa di Consumidor di Banco Central di Aruba (BCA), e Indice di Confiansa di Consumidor a baha cu 3,7 punto di indice, cayendo te na 92,7.

E resultado ta mustra cu consumidornan ta sigui pesimista tocante situacion economico actual y e expectativa pa e futuro cercano. Segun BCA, tanto e percepcion di e situacion economico actual como e expectativa pa e proximo lunanan a registra un deterioro durante e periodo evalua.

E Indice di Habito di Consumidor a baha cu 4,4 punto te na 93,3. Mientrastanto, e Indice di Situacion Actual a cay te na 92,5, mientras cu e Indice di Expectativa a registra un score di 92,7.

Un di e preocupacionnan principal cu a sali for di e encuesta ta e expectativa cu prijsnan lo sigui subi. No menos cu 96% di e consumidornan consulta ta spera cu costo di bida lo ta mas halto den e siguiente seis lunanan.

Ademas, e cantidad di personanan cu ta considera cu nan poder di compra a empeora compara cu seis luna pasa a subi significativamente. Den e promer trimestre di 2026, 93% di e respondentenan a indica cu nan no por cumpra mes cantidad di producto y servicio cu nan entrada actual, un aumento di 13 punto di porcentahe.

E encuesta tambe ta revela cu mas familia ta sinti nan obligacion di reduci spaarmento. E porcentahe di respondentenan cu a indica cu nan ta spaar menos a subi cu 14 punto di porcentahe te na 46%.

E resultadonan ta confirma cu inflacion y e percepcion di costo di bida continua ta pesa riba confianza di consumidornan, apesar di e fortaleza general di economia local.

E relato completo di e Encuesta di Confiansa di Consumidor ta disponibel na website di Banco Central di Aruba.