Abelardo de la Espriella a gana eleccion presidencial di Colombia

BOGOTA - Abogado Abelardo de la Espriella a bira e presidente nobo di Colombia diadomingo despues di gana e di dos ronda electoral contra Ivan Cepeda. E candidato di movimiento Defensores de la Patria a obtene 12.878.969 voto (49,7%), mientras cu Ivan Cepeda a haya 12.617.038 voto (48,6%).

E resultado ta basa riba e conteo di 98.9% di e mesanan di e proceso electoral aki. E diferencia entre e candidatonan tabata bastante chikito, solamente 275.705 voto, segun informacion publica pa Consejo Nacional Electoral den boletin 14.

Como ciudadano colombiano y mericano, Abelardo de la Espriella lo tuma posesion dia 7 di augustus cu un programa di gobierno cu ta representa un cambio radical pa banda drechi. E plan ta inclui reduci tamaño di Estado y construi megaprizonnan pa confronta e pio ola di violencia cu pais a experencia den e ultimo diez añanan.

PETRO TA DENUNCIA IRREGULARIDADNAN DEN ELECCION DI COLOMBIA

Poco promé cu e anuncio aki a wordo publica, Gustavo Petro a denuncia falta di transparencia den e proceso electoral.

“Mesanan cu no tin firma di juradonan mester wordo impugna inmediatamente. Aun no por wordo determina ken ta e presidente y tin hopi irregularidadnan”, e presidente colombiano a declara.

Den otro publicacion, Petro a expresa:

“E votacion casi empatá, ningun candidato no ta yega na 50%, ta obliga nos spera e escrutinionan oficial. Den e ultimo boletin di preconteo ta 49% contra 48%.”

E urnanan a sera pa 4:00 di atardi, ora local (21:00 GMT), despues di ocho ora di votacion. Ta spera cu promé cu 6:00 di atardi, ora local (23:00 GMT), Registraduria Nacional, cu ta organiza e eleccionnan, lo publica resultadonan consolida di e conteo preliminar, segun agencia di noticia EFE.

E eleccionnan a pasa cu total normalidad, sin incidente di violencia. Ademas, autoridadnan a haci un yamada na ciudadanonan pa respeta e resultado final.