Colombianonan na Aruba por vota te cu diadomingo pa di dos ronda presidencial

ORANJESTAD – Ciudadanonan colombiano cu ta biba na Aruba ainda tin oportunidad pa participa den e di dos ronda di eleccion presidencial di Colombia. E proceso di votacion a cuminsa dialuna 15 di juni y lo continua te cu diadomingo 21 di juni, segun informacion publica pa Consulado di Colombia na Aruba.

Manera Noticiacla a informa anteriormente durante e prome ronda di eleccion, e comunidad colombiano na Aruba ta representa un grupo importante den sociedad Arubiano y tin derecho pa eherce nan voto for di exterior.

E votacion ta tuma lugar na Cas di Cultura, na Vondellaan 2, diariamente entre 8'or di mainta te 4'or di atardi. Solamente personanan cu a completa nan inscripcion electoral promé cu e fecha limite stipula, por participa den e eleccion.

E di dos ronda presidencial ta wordo considera decisivo pa determina ken lo ocupa e puesto mas halto den gobierno colombiano pa e proximo periodo administrativo. P’esey autoridadnan diplomatico ta animando tur esnan cu ta habilita pa vota, pa haci uzo di nan derecho democratico.

Consulado di Colombia na Aruba tambe a recorda votadornan pa verifica cu nan informacion electoral ta correcto prome di presenta na local di votacion. E oficina consular ta disponible pa brinda orientacion y informacion adicional na esnan cu tin pregunta tocante e proceso.

Cu miles di colombiano biba y traha den Aruba, participacion den e eleccion aki ta keda importante pa mantene e conexion cu nan pais natal y contribui na direccion politico di Colombia durante e añanan binidero.