Plan pa elimina ATV y UTV ta provoca preocupacion den sector turistico

ORANJESTAD – Un debate importante a surgiendo na Aruba, despues cu a sali na cla cu gobierno a inclui den su Plan Nacional di Biodiversidad 2024-2030 e meta pa elimina importacion y operacion di ATV y UTV gradualmente pa y riba e isla te na aña 2030. Mientras gobierno ta argumenta cu e medida ta necesario pa proteha naturalesa y biodiversidad, empresarionan y operadornan di e sector ta advirti cu e propuesta por tin consecuencianan serio pa empleo, inversion y turismo local. Algun operador a bisa Noticiacla cu esaki ta manera un baño di awa frieu pa nan. Mester bisa si tambe cu ora cu gobierno actual a anuncia e prohibicion contra e-steps y scooternan electrico, e minister encarga Arthur Dowers a sigura cu no lo haci mescos cu ATV y UTV pasobra nan ta regula y tin ley cu ta regula esaki. Loke kier haci si, ta sigura miho ruta. 

NO TA DUNA PERMISO NOBO PA ATV Y UTV

Segun e documento oficial cu Noticiacla a ricibi, ta mustra cu lo no emiti permiso nobo pa ATV ni UTV, tampoco lo permiti pa reemplasa vehiculonan cu ta sali for di servicio. E plan ta contempla pa limita e actividad na un cantidad reduci di ruta durante un periodo di transicion y eventualmente pone fin na e industria despues di 2030. Mester bisa si tambe cu ta trata di un documento cu gobierno anterior a presenta, pero no ta sigur cu e gobierno actual kier y lo haci esaki. Mientrastanto e operadornan no a warda y a cuminsa bati alarma awor. 

GOBIERNO PREOCUPA RIBA PREOCUPACION AMBIENTAL

Pa loke ta e documento menciona, Gobierno ta basa su posicion riba preocupacionnan ambiental, incluyendo stof, daño na vegetacion, fragmentacion di habitat natural, contaminacion y perturbacion di animalnan den area natural. E vision general ta enfoca riba un modelo di turismo cu menos impacto riba medio ambiente y cu pone mas enfoke riba conservacion.

SECTOR DI UTV, ATV Y JEEP TOURS PREOCUPA

Sinembargo, e propuesta a genera reaccion inmediato den sector di UTV, ATV y Jeep Tours. Durante un reciente reunion cu autoridadnan y den un documento formal entrega na gobierno, representantenan di e industria a expresa cu nan ta comprende e preocupacionnan ambiental, pero cu eliminacion total di e actividad no ta e unico solucion.

TA PERDE POR LO MENOS 600 CUPO DI TRABOU

Nan ta señala cu centenares di puesto di trabou directo y indirecto ta depende di e industria, incluyendo chauffeurnan, guianan turistico, mecaniconan, personal administrativo y otro trahadornan. Ademas, nan ta enfatisa cu e sector ta genera entrada importante pa gobierno door di permitnan, impuesto, seguro y otro obligacionnan financiero.  E empresarionan ta sostene cu hopi turista ta busca precisamente e oportunidad pa descubri e otro banda di Aruba, incluyendo su historia, cultura y paisahenan natural, fuera di e area hotelero tradicional. Segun nan, e beneficio economico di e actividad ta yega tambe na restaurantnan, tiendanan y negoshinan local.

MIHO CONTROL DEN CIERTO AREANAN

Na mes momento, e sector ta reconoci cu tin area caminda mester tin mehor control. P’esey nan ta propone medida manera limitacion di velocidad, control di stof, horario regula, entrenamento obligatorio pa chauffeurnan y aplicacion mas rigoroso di reglanan existente.

BALANSE ENTRE PROTECCION DI PATRIMONIO Y EMPLEO 

Awor e discusion ta gira rond di un pregunta central: con Aruba por logra un balance entre proteha su patrimonio natural y alabes proteha e empleo y inversion cu un sector economico importante a crea durante añanan? Cu gobierno apuntando na conservacion y e sector pidiendo dialogo y consulta, e futuro di ATV, UTV y Jeep Tours ta perfilando como uno di e debate economico y ambiental mas importante cu Aruba lo enfrenta den e lunanan benidero.