MEP ta pidi reunion publico urgente riba retiro anuncia di Mike Eman

ORANJESTAD – Fraccion di MEP den Parlamento di Aruba a solicita formalmente un reunion publico cu Minister-President Mike Eman despues di su anuncio cu e lo entrega e cargo di prome minister riba 1 di januari 2027.

CARTA PA PRESIDENTE DI PARLAMENTO

Den un carta dirigi na Presidente di Parlamento, Alfred Sneek, y firma door tur miembro di fraccion MEP, e partido ta argumenta cu e anuncio tin implicacionnan importante pa gobernabilidad y estabilidad politico di Aruba y, p’esey, mester wordo discuti publicamente den Parlamento.

KIER SA RIBA CONTINUIDAD DI GOBIERNO 

Segun MEP, e declaracion publico di Mike Eman na 15 di juni 2026 cu e lo retira como prome minister y lider politico di AVP ta planta pregunta fundamental tocante e continuidad di gobierno durante un periodo cu Aruba ta enfrenta decisionnan importante riba diferente tema nacional.

MEP ta pidi cu e reunion publico trata, entre otro, e siguiente puntonan:

E procedimiento constitucional y politico cu lo wordo sigui pa nombra un sucesor como prome minister.

Con lo determina e apoyo politico necesario den Parlamento pa e sucesor.

E calendario y criterio cu lo wordo usa pa garantisa un transicion ordena sin crea un vacio administrativo.

E impacto di e anuncio riba estabilidad di coalicion actual y ehecucion di e programa di gobierno.

E consecuencianan pa negociacionnan, procesonan strategico y compromiso internacional cu Aruba tin actualmente.

Den e carta, MEP ta enfatisa cu e prome minister ta ocupa su cargo na nomber di henter pueblo Arubiano y cu un anuncio di e magnitud aki ta exigi transparencia completo y rendicion di cuenta na Parlamento y comunidad.

E partido ta pidi cu e reunion publico wordo agendia cu urgencia pa asina permiti un discusion habri riba e futuro liderazgo politico di Aruba y e implicacionnan di e cambio anuncia.

E peticion ta wordo firma door lider di oposicion Evelyn Wever-Croes hunto cu e otro parlamentario di MEP, incluyendo Endy Croes, Dangui Oduber, Hendrik Tevreden, Shailiny Tromp-Lee, Edgard Vrolijk, Rocco Tjon y Xiomara Maduro.

Cu e solicitud aki, MEP ta aumenta presion pa gobierno duna mas claridad tocante e transicion politico cu lo sigui despues di salida anuncia di Mike Eman na cuminsamento di 2027. Wak e carta di MEP AKI.