Aruba a ricibi 3,6 miyon euro for di programa di reforma di Reino na 2025

WILLEMSTAD/DEN HAAG – Organisacion Temporario di Trabao (TWO) a gasta un total di 21,2 miyon euro durante 2025 pa sostene e reformanan acorda den e Landspakketnan di Aruba, Corsou y Sint Maarten. Esaki ta mas cu e 19,4 miyon euro cu a wordo gasta na 2024.

Segun e informe anual di TWO, gran parti di e fondo, 15,5 miyon euro, a wordo inverti den proyecto y programa di reforma, mientras 5,7 miyon euro a wordo gasta na costo operativo. Ademas, 6,2 miyon euro adicional a bai na proyectonan special.

Pa loke ta Aruba, e isla a ricibi 3,6 miyon euro den apoyo durante 2025. Sint Maarten a ricibi 1,9 miyon euro, mientras Corsou a haya e mayor parti di e fondo cu 9,6 miyon euro. Tambe a inverti 400 mil euro den proyectonan cu beneficia tur tres paisnan.

TWO ta splica cu e apoyo no ta consisti solamente di fondo directo, pero tambe di experto y conocemento tecnico for di ministerionan Hulandes pa yuda implementa e reformanan acorda entre Hulanda y e paisnan Caribense.

E cifranan ta sali for di e informe anual 2025 di TWO. E organisacion ta aclara cu e informacion financiero no a haya un control contabel separa, aunque e gastonan ta forma parti di e presupuesto oficial di Ministerio Hulandes di Asuntonan Interno y Relacionnan di Reino.