Tankero confisca pa Merca ta reaparece cerca di Aruba cu nomber y bandera nobo

MIAMI/ ORANJESTAD – Un tankero petrolero cu anteriormente tabata conocí como Marinera y cu a wordo confisca door di Merca a cuminsamento di aña, a reaparece den Caribe cu un identidad completamente nobo y a wordo observa navegando den awanan cerca di Aruba. Segun investigacion di BBC Verify, e barco, cu anteriormente tabata yama Bella 1 y despues Marinera, a cambia su nomber pa Era y a cambia tambe su bandera for di Rusia pa Comoros. Despues di desaparece for di sistema di rastreo durante varios luna, e tankero a reaparece na april den Golfo di Mexico y awor a wordo localisa den region di Aruba.

ATENCION INTERNACIONAL

E caso a haya atencion internacional despues cu Merca a acusa e barco di participa den transporte di petroleo relaciona cu Venezuela, Rusia y Iran, supuestamente den violacion di sancionnan internacional. Na januari, forzanan militar y Wardacosta mericano a confisca e embarcacion despues di un persecucion cu a dura varios siman. Datonan di navegacion ta mustra cu e tankero a pasa algun luna den cercania di Houston, Texas, prome cu bolbe drenta den Caribe. Riba 6 di juni e la cambia su nomber oficialmente pa Era y despues a sali rumbo pa region caribense.

RELEVANTE PA ARUBA

Pa Aruba, e noticia ta relevante pasobra e embarcacion a wordo identifica navegando den awanan rond di isla, aunke no tin indicacion cu e la haci escala na Aruba of cu tin algun actividad relaciona cu e isla. Sinembargo, e presencia di un barco cu un historia tan controversial den Caribe ta sigui atraye atencion di autoridadnan maritimo y observadornan internacional. E caso ta mustra con embarcacionnan involvi den comercio petrolero internacional ta sigui cambia nomber, bandera y registro den un intento pa sigui opera  den medio di sancionnan y controlnan internacional.