AUA Food Truck Plaza ta crea un espacio nobo di encuentro pa comunidad

ORANJESTAD – Aeropuerto Internacional Reina Beatrix a habri  un espacio nobo di encuentro pa comunidad cu e inauguracion di AUA Food Truck Plaza oficialmente, situa na e area dilanti di e terminal di yegada. Durante un ceremonia simbolico, representante di aeropuerto y miembronan di comunidad a reuni pa marca e apertura di e plasa nobo, cu ta ofrece un lugar agradabel pa hendenan pasa tempo mientras nan ta warda riba famia y amigonan cu ta yega of ta sali for di Aruba.

AMBIENTE COMODO 

E iniciativa ta busca crea un ambiente mas comodo y accesibel rond di aeropuerto, unda residente, trahadornan di aeropuerto, taxistanan, pasaheronan y bishitantenan por reuni, socialisa y disfruta di un momento di descanso.

FORTALECE SENTIDO DI COMUNIDAD ROND AEROPUERTO

Segun e organisadornan, e espacio nobo ta contribui na fortalece e sentido di comunidad rond di aeropuerto, convirtiendo e area den mas cu solamente un punto di entrada y salida, pero tambe un lugar di encuentro pa hende di diferente sector di sociedad. Durante e apertura, esnan presente a haya oportunidad pa comparti, conversa y disfruta di diferente opcionnan di cuminda y bebida den un ambiente informal y amigabel. Cu e apertura di AUA Food Truck Plaza, aeropuerto ta amplia e facilidadnan disponibel pa comunidad y bishitantenan, creando un espacio adicional caminda hendenan por reuni y pasa un rato agradabel cerca di uno di e luganan mas transitado di Aruba.