Motociclista ta e di 7 victima fatal den trafico pa 2026

ORANJESTAD – Un accidente serio cu a tuma luga mainta diadomingo na Sabana Liber a cobra otro bida den trafico arubano. E victima, Johan Fernando Vasquez Lopez, di 33 aña, a fayece diamars atardi den hospital despues di lucha pa su bida durante dos dia.

Segun informacion di Cuerpo Policial Aruba, pa mas o menos 5:40 di mainta diadomingo, central di polis a ricibi un notificacion di un accidente dilanti un percela na Sabana Liber, unda un brommer tabata envolvi.

Patrulla di polis y ambulance a wordo despacha inmediatamente pa e sitio. Ora e prome polisnan a yega, nan a encontra un homber gravemente herida.

E informacion preliminar ta indica cu, probablemente, e conductor di e brommer a perde control y a dal contra e acera.

Personal di ambulance a brinda e victima asistencia medico na e sitio, despues di cual a wordo stabilisa y transporta cu maximo urgencia pa hospital. E la keda interna den Unidad di Cuido Intensivo (ICU).

Specialistanan di trafico y personal di Polis Technico (BFTO) a presenta na e escena pa conduci e investigacion necesario. Tambe Departamento di Slachtofferhulp a wordo activa pa brinda apoyo na famia di e victima.

Diamars merdia, personal medico a informa polis cu e condicion di e paciente a deteriora gravemente. Pa 1:17 di atardi, un dokter a constata morto di Johan Fernando Vasquez Lopez, naci  na Colombia riba 10 di maart 1993.

E investigacion ta continua pa determina exactamente con e accidente a sosode.

Cu e fayecimento aki, e cantidad di victimanan fatal den trafico pa aña 2026 a subi na siete.

Cuerpo Policial Aruba ta expresa su sincero condolencia na famia, amigo y sernan keri di e fayecido durante e momento dificil aki.