Gobierno ta advirti contra rosamento ilegal y priminti mas control riba desaroyo di tereno

ORANJESTAD – Gobierno di Aruba a reafirma cu cumplimiento di leynan y proceduranan di ordenacion territorial no ta opcional. Autoridadnan a expresa preocupacion cu continuamente ta existi casonan di rosamento ilegal di tereno y desaroyonan cu no ta sigui e proceduranan legal establece. Segun gobierno, e Ruimtelijk Ontwikkelingsplan met Voorschriften (ROPV) ta determina claramente con actividadnan manera rosamento, modificacion y desaroyo di tereno mester wordo maneha. Prome cu cualkier trabou por cuminsa, propietario mester haya e permiso necesario y pasa door di evaluacionnan tecnico y ambiental.

ROSA TERENO SIN PERMISO

Gobierno a indica cu den pasado y presente a registra caso unda tereno a wordo limpia sin permiso, of unda desaroyadornan a intenta evita e proceduranan legal pa despues solicita permiso di construccion. E practicanan aki ta considera ilegal y contrario na e objetivo di e leynan existente.

LEY PA PROTEHA INTERES PUBLICO

Autoridadnan a enfatisa cu e reglanan ta existi pa proteha interes publico, medio ambiente y e espacio limita cu Aruba tin disponible. Tambe a reconoce cu e instrumentonan legal actual no semper ta suficiente pa sanciona infraccionnan, motivo pa cual gobierno a cuminsa un proceso pa fortalece supervision, control y aplicacion di ley. Segun gobierno, e iniciativa aki forma parti di su agenda di reconstruccion y lo enfoca riba mas cumplimiento di reglanan di ordenacion territorial y proteccion ambiental.

YAMADA PA SIGUI TUR REKISITO LEGAL

Gobierno a conclui cu Aruba, como un isla chikito cu recurso natural limita, no por permiti cu areanan natural y sistemanan ecologico wordo perdi door di accionnan cu no ta respeta e proceduranan legal. Pa e motibo ey, a haci un yamada na propietarionan, contratistanan y desarroyadornan pa sigui estrictamente tur rekisito legal durante proyectonan di construccion y desaroyo.