Corsou ta evalua elimina visa pa Venezolanonan pa impulsa turismo

WILLEMSTAD – Minister di Desaroyo Economico di Corsou, Roderick Middelhof, a confirma cu gobierno ta evalua e posibilidad pa elimina e obligacion di visa pa ciudadano venezolano, cu meta di atraha mas turista for di Venezuela bek pa e isla.

“Actualmente nos ta evalua pa kita e visa, pasobra manera ta conoci, tabatin un tempo cu Venezuelanonan no mester tabata visa pa drenta Corsou. Awor nos ta mira e posibilidad pa bolbe na e situacion ey y tambe atraha mas turismo for di Venezuela,” Middelhof a declara.

E minister a agrega cu anteriormente no tabatin un presupuesto specifico pa promociona Corsou den mercado venezolano, pero pa aña 2027 gobierno a reserva fondo pa e meta ey.

“Tin un cantidad di placa cu nos lo inverti den Venezuela pa por estimula y atraha mas turismo for di Venezuela,” e la splica.

Den un entrevista cu influencer y biahero Rachell Sandoval, Middelhof a destaca e relacion historico y economico fuerte entre Corsou y Venezuela. Segun dje, Corsou depende hopi riba importacion di fruta y berdura for di Venezuela.

“Nos lo gusta wak mas persona for di aya bishita nos isla. Venezuelanonan semper tin un luga special den nos curason. Mi ta kere cu muy pronto Corsou lo habri su portanan bek pa Venezuela, pa e nobo Venezuela, manera hopi hende ta yama dje. Y ciertamente nos lo haci esey cu hopi amor,” e minister a expresa.

Middelhof a comenta tambe cu actualmente Corsou ta enfoca riba turismo di categoria halto. E meta ta pa yega na un miyon turista pa aña.

“Nos ta cerca di e cifra ey. Den pasado nos a pasa pa periodonan dificil cu solamente 150.000 of 200.000 bishitante pa aña, pero awor nos ta sigui creciendo,” e a bisa.

Mientrastanto, datonan comparti pa vicepresidente di Camara di Comercio La Vela di Coro, Juan Gotopo, ta mustra cu cantidad di turista venezolano cu a bishita Corsou a baha considerablemente.

Segun cifranan di Oficina di Turismo di Corsou, entre januari y mei di e aña aki tabatin un caida di 63% den cantidad di bishitantenan venezolano compara cu e mes periodo den 2025. Mientras 10.025 venezolano a pasa anochi na Corsou den e prome cinco lunanan di 2025, solamente 3.714 a haci e biahe durante e mesun periodo di e aña aki.

E caida significativo den turismo venezolano ta un di e motibonan principal pakico gobierno di Corsou ta considera medida nan pa facilita entrada di bishitante for di e pais bisiña.