Seleccion di Corsou ta recorda nos di e esencia berdadero di futbol!

Scirbi pa Tito Laclé

E momento a yega pa experencia algo cu hopi di nos semper a desea, a soña y angela, pero nunca a kere cu por a sosode. Corsou hungando den mundial di futbol! Y sigur hopi lo bisa, nos tabata sa cu e dia aki lo a yega. Mi kier alertabo pa lesa cuidadosamente, y lesa e analisis aki FULL, TE final. Pasobra e comienso, lo por zona ‘negativo’, pero keremi, bo lo  comprondemi na final. 

Bueno, laga mi cuminsa asinaki. E logro, ta parcialmente danki na e hecho cu e tres paisnan anfitrion, no mester a pasa den e cualificacion. Merca, Mexico y Canada. Tur tres pais lo mester a confronta Corsou y nan ta e ekiponan mas fuerte di e  grupo. E biaha aki, como cu nan ta ‘afo’ di e cualificacion siendo paisnan anfitrion, Corsou no mester a confronta nan. 

CHENS DI CORSOU

Banda di e euphoria cu Corsou ta participa, tin esnan cu ta keda realista y ta sigura cu e chens cu Corsou por logra algo na e mundial ta zero. Nada. Nada den sentido di gana, empata y asina logra sikiera un punto. Mi a mira varios pronostico pasa mi dilanti y e score ta varia di entre 5-0 te 3-0 cu Corsou lo perde contra Alemania diadomingo awor. Un a duna Corsou 1 gol, pero cu e score ta bira 2-1 pa Alemania. Dus, realisticamente, Corsou no tin chens. Prome bo critica mi negativismo, mi kier splica cu no ta negativismo, sino e realidad futbolistico. PERO, y scuchami un rato, SEMPER tin e chens cu por tin sorpresa grandi. E bala ta rondo.  Y den pasado, ekiponan grandi a perde nan prome partido. Entre nan Alemania a perde hopi di nan prome partido, y Argentina ta otro. Pues, e posibilidad cu Corsou por logra algo toch, cu e pensamento ey, ta keda bibo. 

CORSOU A GANA CABA!

Pero, laga mi bisti e petchi POSITIVO awo. Corsou a gana caba!. Awor bo lo culpami di ta OVER positivo. Pero, laga mi splica. 

Cu Corsou no tin chens pa score of gana of clasifica den su ronda, awor ta BIJZAAK. Cu e cualificacion pa mundial, Corsou a GANA caba!. Den UN solo tiro, e isla a logra haya reconocemento mundial, y por casi bisa, surpasa Aruba pa un rato, den popularidad. Si antes, tabata defini Corsou como e isla banda di Aruba, awor ta Aruba ta e isla banda di e cualificador Corsou. Loke cu e cualificacion a haci, ta UNI no solamente Corsou, pero TUR e islanan di Caribe Hulandes. Y esaki porta bal MAS cu gana un di e partidonan. E la pone tur hende lubida tur problema cu tin. E la duna Corsou un boost di mercadeo, cu nunca ningun oficina di turismo of gobierno por a paga p’e. Y pa un canal manera N.O.S. anuncia separadamente cu nan lo transmiti TUR wega di CORSOU y HULANDA, tambe ta bisa algo. Nan ta transmiti tur wega, pero pa anuncia separadamente cu nan ta enfoca riba Corsou y Hulanda, ta grandi tambe. Pero,  mi tin algo mas riba e logro grandi di Corsou. 

HUNGADORNAN DI CORSOU A CORDA NOS KICO TA IMPORTANTE

Loke Corsou ta haciendo (caba) den e Mundial aki merece pa bira viral, pasobra nan ta recordando mundo henter algo cu futbol nunca mester a lubida.

Y basta mira e hungadornan pa compronde exactamente di kiko mi ta papia. Siendo e seleccion mas chikito den historia di Mundialnan, tiki otro ekipo ta parece di ta bibando e experencia aki cu tanto ilusion manera nan.

Prome a mira nan bailando y celebrando hunto cu e piloto cu lo hiba nan pa Mundial. Despues, nan a bolbe steal  the show durante un sesion oficial di grabacion di FIFA, unda loke mester tabata solamente un sesion di foto cu a termina den un fiesta di berdad.

Entre harimento, baile y broma, e hungadornan tabata parce mas preocupa pa disfruta e momento cu pa pose pa camaranan. Y durante entrenamentonan tambe, nan a mustra e mesun energia y e mesun deseo pa disfruta cada momento. Drentando stadion na bailamento y asina mi por sigui menciona. 

Y talbez precisamente esey ta e motibo cu nan a conkista miles di fanatico. Pasobra mientras hopi otro seleccionnan ta bibando e Mundial cu presion, Corsou ta haci esey cu humildad, ilusion y un felicidad contagioso.

Y den un epoca unda futbol hopi biaha ta parece ta gira rond di placa, patrocinadornan y fama, nan ta recorda nos cu e esencia berdadero di e deporte ainda ta biba. Mama wak! Corsou t’ey!