Tres muher hoben deteni den investigacion di agresion na Seroe Patrishi y Ponton

ORANJESTAD – Cuerpo Policial Aruba a confirma cu tres muher hoben a wordo deteni diabierna mainta den conexion cu un caso di agresion cu a sosode diaranson anochi, 3 di juni 2026, na diferente locacionnan na Seroe Patrishi y Ponton.

E investigacion ta den man di Departamento di Jeugd en Zeden Politie (JZP), cu despues di ricibi e keho a actua rapidamente y a logra identifica y detene e sospechosonan den un corto periodo di tempo.

Esnan deteni ta un muher hoben di fam B., naci  na Aruba y di 16 aña di edad, un muher hoben di fam T., naci  na Aruba y di 17 aña, y un otro  muher hoben di fam A., di 18 aña.

Polis no a divulga mas detaye tocante e circunstancianan exacto di e agresion, pasobra cu e investigacion ainda ta andando.

Cuerpo Policial Aruba a enfatisa cu no lo tolera ningun forma di agresion den comunidad y cu lo sigui tuma accion firme contra esnan cu ta comete acto di violencia.

“Nos ta manda un mensahe cla cu agresion no tin lugar den nos sociedad. E tipo di comportamiento aki ta contra ley y lo sigui haya atencion prioritario di polis,” segun CPA.

Polis ta haci un peticion na comunidad pa coopera cu e investigacion. Personanan cu a mira algo, tin informacion of conoce circunstancianan relaciona cu e caso por contacta TIPLIJN 11141. Autoridadnan ta sigura cu tur informacion lo wordo trata confidencialmente y cu e informante lo keda completamente anonimo.