Abogado di R. Wever “Cliente a actua segun instruccion directo di (ex) minister Otmar Oduber”

ORANJESTAD – R. Wever no mester wordo considera culpabel den e caso Flamingo, paso cu durante tur su accionnan como teamcoordinator di Uitgiftecentrum na Departamento di Infraestructura y Planificacion (DIP), e tabata actuando bou di instruccion directo di e e tempo ey minister Otmar Oduber. Esaki ta e posicion central presenta door di abogado Jairon Odor den su defensa final den Corte di Apelacion.

A SIGUI ORDEN

Den e documento entrega na Hof, Odor a argumenta cu Wever nunca a actua for di su mes iniciativa y cu e tabata sigui orden directo di su superior politico. Segun e defensa, Corte den prome instancia no a duna suficiente peso na varios circunstancianan importante cu por cambia completamente e evaluacion di e caso.

CONDENA DEN PROME INSTANCIA

Wever a wordo condena anteriormente pa complicidad den caso di estafa, falsificacion di documento y abuso di cargo publico. Como castigo, e la ricibi 180 ora di trabou comunitario y cinco luna di prizon condicional cu un periodo di prueba di tres aña. Sinembargo, Odor ta sostene cu e condena no ta haci husticia na e realidad di loke a sosode.

“NO TABATIN ESPACIO PA DISCUSION”

Segun e defensa, (ex) minister Oduber a duna un instruccion cla y directo tocante e asignacionnan di tereno, indicando cu “no tabatin espacio pa discusion”. Odor a argumenta cu Wever no tabatin ningun interes personal of financiero den e decisionnan toma.  E abogado a enfatisa cu su cliente no tabata conoce ni Peñate Cano, ni Figaroa ni Genser personalmente, y cu nunca e la ricibi ningun bentaha personal.

UN FUNCIONARIO NO POR SIMPLEMENTE NENGA UN MINISTER 

Un di e argumento principal di e defensa ta cu Wever a wordo coloca den un situacion dificil entre dos obligacionnan. Di un banda, e tabatin su deber como funcionario pa sigui procedimentonan corecto. Di otro banda, tabatin un instruccion directo di e minister responsable. Segun Odor, den practica un funcionario den Aruba dificilmente por nenga un orden directo di un minister sin enfrenta consecuencia serio profesional. E defensa incluso ta argumenta cu un rechazo di e orden por a conduci na acusacion di negligencia laboral y posiblemente retiro.

NINGUN DAÑO FINANCIERO PA ARUBA

Odor tambe ta argumenta cu ningun daño financiero real a wordo causa na Pais Aruba. Segun e documento, e erfpachtnan na Malmok nunca a wordo oficialmente otorga y ningun acuerdo definitivo a wordo firma. Ademas, Genser eventualmente a ricibi otro parcela na Palm Beach y a acepta e solucion. “Niun persona a keda perhudica y ni Pais Aruba a sufri daño,” ta e posicion presenta den e defensa.

POLITICA INTERNO DI DIP

E defensa ta argumenta tambe cu durante e periodo ey tabatin un politica interno den DIP pa asigna ciertonan parcela grandi na yama “Young Professionals” y otro proyectonan special. Segun declaracionnan di ex-director di DIP, Rigoberto H. Croes, e asignacionnan na Peñate Cano y Figaroa no tabata contrario na e politica cu tabata vigente na e momento. Odor argumenta cu si e director di DIP mes no a mira ningun irregularidad den e proceso, no por wordo spera cu Wever a percata cu posiblemente tabatin un violacion penal.

COMPARACION CU CASO ABATH

Den su defensa, Odor tambe ta referi na un caso anterior contra Franklin Feliciano Abath, den cual e tribunal a conclui cu e acusado simplemente a sigui instruccionnan di e persona responsable pa e decision final. Segun e defensa, e situacion di Wever ta comparabel y mester wordo evalua den e mes contexto.

DEFENSA TA PIDI ABSOLUCION TOTAL

Basando su mes riba tur e argumentonan presenta, Odor ta pidi cu Corte di Apelacion absuelve su cliente Wever completamente di tur acusacionnan. Como alternativa, e defensa ta solicita cu Hof declara cu Wever actuo den un estado di necesidad (noodtoestand), paso cu e tabata den un conflicto entre obligacionnan y no tabatin libertad real pa haci otro seleccion.

Segun e defensa, no tabatin intencion criminal, no tabatin bentaha personal y tampoco tabatin daño real pa Pais Aruba, motibonan cu segun Odor mester conduci na absolucion of exoneracion total di su cliente.