Alberto: “Si nos no ta consciente di e pasado, nos no por kibra e patronnan negativo”

ORANJESTAD – Conscientisacion tocante e impacto cu sclabitud a laga atras den nos sociedad ta uno di e aspecto mas importante den e trabou di conmemoracion y educacion. Esaki ta segun Jefka Alberto, community manager pa e parti Karibense di Reino den Komite di Konmemoracion Pasado di Sclabitud (Herdenkingscomite Slavernijverleden) durante e programa Noticiacla LIVE diahuebs anochi cu periodista Tito Laclé.

LEGADO DI SCLABITUD NO TIN LIMITACION 

Durante su presentacion, Alberto a enfatisa cu e legado di sclabitud no ta limita solamente na eventonan historico, pero cu e tin influencia riba generacionnan cu a sigui despues di abolicion y te ainda riba nos sociedad actual. “Nos no ta consciente di dje. Nos ta papia di trauma transgeneracional, di cosnan cultural y actividadnan cultural cu hopi biaha nos no sa di unda nan ta bin,” Alberto a declara.

INFLUENCIA DI PASADO

Segun Alberto, e influencia di e pasado por wordo mira den e manera cu hende ta comunica cu otro y den expresionnan cu durante hopi decenionan a bira parti di e bida diario. “Nos ta papia di palabra manera ‘negrita bonita’, ‘bon cabey’, ‘mal cabey’, ‘color cla’ y ‘color cera’. Tambe di e idea pa busca un homber blanco of un mujer blanco pa ‘drecha’ famia. Tur esaki tin nan rais den e pasado di sclabitud,” Alberto a splica.

EFECTO DI SLABITUD 

Alberto a señala cu si un sociedad no ta consciente di e efecto cu sclabitud a tin riba e generacionnan cu a biba durante y despues di e periodo ey, lo ta dificil pa rompe cu ciertonan patronnan cu ainda ta presente awe. “Si bo no ta consciente di dje, bo no por kibra e patronnan tampoco,” Alberto a bisa. E community manager a menciona cu e legado historico por manifesta den diferente aspecto di crianza y comportamiento social. Como ehemplo, dje a menciona e uso di castigo fisico den educacion di muchanan.

COSNAN PEGA DEN PASADO

“Tin cosnan cu a keda warda den pasado. Por ehemplo, e manera cu nos ta castiga nos yiunan. Di unda e cos ey a bin? Tur e cosnan aki ta motibonan pa nos bira consciente di nan origen y kibra patronnan negativo,” Alberto a expresa. Segun Alberto, conmemoracion di e pasado di sclabitud no ta solamente pa mira bek na historia, pero tambe pa crea mas comprension tocante e impacto cu e periodo ey a tin riba generacionnan posterior.

CONCIENTE DI ORIGEN

“Tur e cosnan ey ta cosnan pa nos bira consciente di nan origen, pa nos por kibra patronnan negativo,” Alberto a conclui. E mensahe central ta cu reflexion, educacion y transferencia di conocimiento entre generacionnan ta esencial pa logra mas entendimento di nos historia comun y pa contribui na un sociedad mas consciente di su pasado y su futuro.