De Freitas: “San Nicolas no mester di fiesta so, nos mester trabao y industria”

ORANJESTAD – Presidente di San Nicolas Business Association (SNBA), Errol de Freitas, a expresa preocupacion fuerte tocante direccion actual di desaroyo den Aruba y falta di accion concreto pa fortalece economia di San Nicolas. Durante e entrevista cu Tito Laclé den programa Noticiacla LIVE diamars anochi, de Freitas a cuestiona prioridadnan di Gobierno y e impacto real di diferente actividadnan cultural y turistico den distrito.

Segun de Freitas, aunke evento manera Carubian Festival ta positivo pa cultura y ambiente den ciudad, San Nicolas actualmente ta enfrenta problema economico mucho mas profundo.

“Fiesta ta bon, pero e solucion cu nos mester awor ta trabao, trabao y mas trabao,” de Freitas a declara.

Presidente di SNBA a enfatisa cu Aruba mester atrae industria y inversion real pa crea oportunidadnan economico sostenible, specialmente pa San Nicolas. Segun e, e distrito no ta busca bira un copia di Oranjestad, pero mas bien fortalece su propio identidad cultural y comercial.

“Na San Nicolas nos ta e tiendanan chikito, panaderianan, nos comida y nos cultura. Nos mester diversidad y oportunidad pa crece,” el a comenta.

De Freitas a revela cu diferente inversionista ya a cumpra edificio den Main Street di San Nicolas, pero hopi di nan no ta move padilanti door di falta di confianza y apoyo.

“Mi tin un inversionista cu a cumpra cuatro edificio y awor e ta bende nan bek. E la bisa claramente cu Gobierno nunca lo yuda,” de Freitas a relata.

Segun e presidente di SNBA, e situacion actual ta lanta pregunta serio tocante cuanto importancia Gobierno realmente ta duna districtonan di Aruba.

“Ki tan importante nos districto ta pa nos pais? Si nan tabata importante, e situacion no lo tabata manera awor,” e la bisa.

De Freitas a enfatisa cu Aruba mester busca un balansa economico entre diferente regionnan di isla y no concentra mayoria di desaroyo den un area solamente.

“E no por ta manera awor. Nos mester trece balansa bek den nos pais,” el a expresa.

Durante e entrevista, presidente di SNBA tambe a toca e oportunidadnan economico cu por resulta di situacion actual na Venezuela. Segun e, Aruba mester pensa strategicamente tocante con pa beneficia economicamente di posicion geografico y historia industrial di San Nicolas.

“Cu loke ta pasando na Venezuela, Aruba mester busca e mihor beneficio posible pa nos pueblo,” de Freitas a conclui.