Nacionan Uni ta alerta pa posible El Niño cu por trece mas calor y secura pa e.o. Aruba y Corsou

GENEVE – Organisacion Meteorologico Mundial (WMO) di Nacionan Uni a advirti cu e posibilidad pa un nobo fenomeno El Niño awor a subi te mas di 80 porshento. Segun Naciones Uni, e fenomeno climatico por provoca mas ola di calor, secura, yobida extremo y record nobo di temperatura den diferente parti di mundo, incluyendo Caribe.

El Niño ta forma ora parti di Oceano Pacifico bira excepcionalmente calor, loke ta afecta corrientenan di aire y sistema di tempo mundialmente. Segun WMO, temperatura di awa den oceano ya ta bastante ariba di limite normal pa declara oficialmente un episodio di El Niño.

Pa islanan di Caribe manera Aruba y Corsou, e fenomeno por significa un temporada mas seco y mas calor. Meteorologonan ta indica cu durante periodo di El Niño normalmente tin menos yobida y periodonan mas largo di seco den region Caribe.

E condicionnan aki por afecta naturaleza, agricultura y disponibilidad di awa. Tambe e sensacion di calor por aumenta door di temperatura mas halto di laman y aire, creando un clima mas sofocante, specialmente pa personanan grandi di edad y hende cu ta traha pafor.

Na mes momento, El Niño generalmente ta reduci cantidad di tormenta tropical y horcan den Oceano Atlantico, pasobra cambionan den corrientenan di biento ta dificulta formacion di horcan. Sin embargo, meteorologonan ta advirti cu ainda durante un temporada mas trankil, tormentanan fuerte ainda por desaroya.

Segun Naciones Uni, ultimo periodo fuerte di El Niño entre 2023 y 2024 a contribui significativamente na recordnan mundial di calor. Organisacion ta spera cu den proximo lunanan tambe por tin temperatura record nobo.