Teatro Intimo ta trece un experiencia cultural unico y local na Cas di Cultura

ORANJESTAD – Cas di Cultura lo bira escenario di un experiencia teatral completamente diferente y netamente local durante e weekend aki cu presentacion di “Teatro Intimo”, un concepto innovador cu ta combina arte, emocion y interaccion den un ambiente unico.

Publico lo tin oportunidad di disfruta di tres obra diferente cada anochi, cu un total di seis presentacion durante dos dia. Tur obra lo wordo presenta na nan propio espacio apart, mientras cu e publico lo wordo movi di un escenario pa otro despues di cada presentacion, creando un experiencia dinamico y  special.

E presentacionnan lo cuminsa 7’or di anochi, sigui pa 8’or y 9’or, tur den diferente espacio di Cas di Cultura. E organisacion a informa cu solamente 150 ticket ta disponibel y cada espacio lo ricibi un maximo di 50 persona, pa mantene e ambiente intimo y cercano entre artista y publico.

Segun organizadornan, Teatro Intimo ta enfoca riba promove talento local y brinda un experiencia cultural cu ta conecta directamente cu comunidad Arubiano. E concepto no solamente ta ofrece entretenimiento, pero tambe un manera creativo pa aprecia teatro y arte local di un forma mas personal.

Carchinan ta obtenibel na Cas di Cultura y tambe via Pay.aw. Entrada pa un dia ta cuesta Awg. 75, mientras cu un pase pa dos dia ta Awg. 125. Tur dos opcionnan ta inclui dos consumicion, entre esakinan cerbes, biña, refresco of awa.

Organisacion ta invita comunidad pa no perde e oportunidad unico aki y bishita un evento cultural cu ta promete surprende y inspira.