Reunionan di IPKO ta cuminsa e siman aki na Den Haag

DEN HAAG – For di diabierna 5 di juni te cu dialuna 8 di juni 2026, lo tene e Interparlementair Koninkrijksoverleg na Den Haag. Delegacionnan di Parlamento di Aruba, Curaçao, Sint Maarten y Parlamento hulandes lo reuni pa discuti colaboracion y diferente asunto cu ta afecta e paisnan dentro di Reino Hulandes.

E reunion lo habri oficialmente diabierna mainta den sala principal di Tweede Kamer. Lidernan di delegacion lo presenta un update tocante desaroyo reciente den nan paisnan. Entre nan tin senador hulandes Paul Rosenmöller, kende ta lider di delegacion di Staten-Generaal.

Atardi, delegacionnan lo bishita proyecto “De Buurt als Ecosysteem” na Haarlem, cu enfoque riba envehecemento di poblacion.

Diasabra 6 di juni, e reunion lo continua cu e tema principal: cooperacion dentro di IPKO y den Reino. Tambe lo tin un panel discusion bou di direccion di Wouter Veenendaal di Universiteit Leiden.

Dialuna 8 di juni, representante di Nationaal Burgerberaad Klimaat lo presenta con ciudadano por participa activamente den combate contra cambio climatologico. E reunion lo cera cu firma di acuerdonan y un conferencia di prensa conjunto cu lidernan di e cuatro delegacionnan.

Interparlementair Koninkrijksoverleg ta un encuentro cu ta wordo tene dos biaha pa aña entre Parlamento di e paisnan di Reino Hulandes. Desde 2010, despues di disolucion di Antiyas Hulandes, IPKO ta consisti di Parlamento di Aruba, Corsou, Sint Maarten y Hulanda. Durante e reunionnan, delegacionnan ta intercambia informacion, posicionnan politico y discuti asunto importante pa futuro di Reino.