Polis a dal baho mundo duro: 7 deteni y cantidad grandi di droga confisca

ORANJESTAD - Departamento di Crimen Organisa (UGC) di polis na Aruba, a logra un golpi fuerte contra trafico di droga despues di un operacion grandi cu a resulta den detencion di 7 persona y confiscacion di varios bulto di droga, un auto y dos jetski. Asina Cuerpo policial a informa dialuna mainta. 

E accion a cuminsa diabierna atardi na area di Rodgers Beach, unda investigadornan a detecta y confisca cantidad grandi di droga. Durante e operacion, polis a detene cinco homber naci na Aruba y un muher naci na Colombia.

Despues di un investigacion relampago, UGC a continua cu e accion den oranan di anochi cu dos entrada hudicial simultaneo na Seroe Colorado y na Appelsinastraat. Na e ultimo adres, polis a detene un otro homber sospecha di posesion y bendemento di droga.

Diasabra mainta, investigacion a sigui na costa unda polis a haya mas bulto di droga. Durante henter operacion, Kustwacht Caribisch Gebied a brinda apoyo tanto riba lama como na tera.

Segun polis, e investigacion ta ainda den pleno desaroyo y no ta descarta cu mas detencion lo sigui. Cuerpo Policial Aruba ta pidi comunidad cu tin informacion of cu a mira algo sospechoso pa contacta tipline di polis na 11141. Anonimato ta garantisa.