Papiamento den Hofi: FLP ta sigui lucha pa nos idioma

ORANJESTAD - Fundacion Lanta Papiamento (FLP) a celebra un anochi cultural special durante e evento “Papiamento den Hofi” na Arubiana-Caribiana na Bachstraat. E celebracion tawata enfoca riba valor y importancia di Papiamento como idioma oficial di Aruba y e lucha cu a dura añanan pa logra y proteha nos idioma.

E programa tabata inclui poesia, baile, lectura, fotografia, historia y presentacion di bukinan nobo di diferente autor local. Miembronan di FLP, Shahayra Croes y Carlos Croes, tawata presenta e anochi como MC. Tambe Rubia Bernabela di Fundacion Corector di Papiamento a tuma parti den e actividad.

Un di e momentonan importante di e anochi tawata e lectura di Doctor Joyce Pereira, kende a papia tocante historia y origen di Papiamento. Durante e presentacion tambe a mostra fragmentonan di video crea door di FLP den pasado, cu participacion di personalidadnan manera Ramon Todd Dandare, Elliënne Riatiga, Evelyn Ruiz-Croes y Lyonel Dirksz.

Durante e encuentro, a wordo recorda cu na aña 2003 Parlamento di Aruba a reconoce Papiamento oficialmente como idioma oficial. A enfatisa cu apesar di intentonan historico di colonisadornan pa impone Hulandes, Papiamento a logra sobrevivi y bira un simbolo fuerte di identidad cultural.

FLP a ricibi reconocemento pa e trabou continuo cu nan ta haci pa promove y defende nos idioma. Segun participante nan, e meta final ta pa algun dia logra cu Papiamento bira completamente integra den sistema educativo di Aruba.