Aruba ta produci mas local, pero ainda dependiente di importacion di cuminda

ORANJESTAD – Aruba tin un sector agricola chikito pero moderno, cu ta destaca specialmente den produccion di webo, berdura hidroponico y champignon. Apesar di esey, mas cu 93% di cuminda riba isla ainda ta bin di afo, segun un estudio nobo tocante produccion local den Caribe Hulandes.

E investigacion ta mustra cu Aruba tin un grado di autosuficiencia di solamente 6,57%. Esaki ta pone Aruba mas abou cu Corsou y Boneiru, pero mas halto cu Saba y Sint Maarten.

Segundo, e estudio, e porcentahe abou ta resultado di e enorme demanda di cuminda riba Aruba. E isla tin hopi habitante y un sector turistico grandi, loke ta causa cu consumo ta muchisimo mas halto cu loke agricultura local por produci.

Aunke asina, Aruba ta logra resultado impresionante den algun producto specifico. Cerca 90% di tur champignon consumi riba isla ta wordo produci localmente. Producion di webo tambe ta fuerte, cubriendo mas cu 40% di demanda local.

Den sector di berdura, specialmente lechuga y bladgroenten hidroponico, Aruba ta cubri mas cu 21% di consumo local. E investigadornan ta bisa cu Aruba ta demonstra con tecnologia moderno y agricultura intensivo por duna bon resultado, apesar di poco tereno disponible.

Segun e estudio, Aruba tin solamente cerca 34 hectare di tereno usa pa produccion di cuminda, cu ta menos cu 0,2% di superficie total di isla. Pesei, Gobierno ta sigui inverti den innovacion manera Agri-Innovation Park, enfoca riba agricultura den cas, hidroponics y profesionalisacion di sector.

E informe tambe ta alerta cu Aruba ainda ta vulnerable pa problema den cadena internacional di importacion. Cuminda riba isla ta depende hopi di importadornan, transporte y logistica. Si tin problema den haf, avion, of transporte refrigera, supermercado y horeca por sinti e impacto rapidamente.

Segun e calculacionnan, si importacion lo para completamente, Aruba tin menos cu dos dia di voorraad di berdura y poco mas cu dos dia di fruta disponible. Solamente webo ta ofrece un buffer mas grandi, cu casi siete dia danki na produccion local.