Gobierno a pone deadline di 14 dia pa e-steps, e-bikes y e-scooters ilegal

Gobierno ta pone deadline di 14 dia pa e-steps y e-scooters ilegal

ORANJESTAD – Gobierno di Aruba oficialmente a publica un advertencia general diabierna den Landscourant tocante huurmento ilegal di e-steps, e-bikes y e-scooters pa uso riba caminda publico sin permiso obligatorio.

Minister di Husticia, Transporte Publico y Energia, Arthur Dowers, a declara cu empresanan y operadornan cu ta ofrece e vehiculonan aki comercialmente sin permiso ta actuando contrario na Landsverordening Personenvervoer.

Segun Gobierno, e vehiculonan electrico aki ta wordo considera “verhuurmotorfietsen” ora nan ta wordo huur contra pago, sin chauffeur, y uza riba of for di caminda publico. Pa e motibo ey, un permiso oficial ta obligatorio promé cu e actividadnan aki por opera legalmente.

Den e aviso oficial, Gobierno a duna un periodo di 14 dia calendario despues di publicacion pa operadornan stop cu e actividadnan ilegal of regularisa nan situacion conforme ley. Entre otro, empresanan mester:

-             stop cu huur di e vehiculonan;

-             desactiva QR-codes, apps y otro sistema digital di huur;

-             kita e vehiculonan for di caminda publico y area accesibel pa publico;

-             elimina publicidad y señalnan relaciona cu e huurmento.

Gobierno a enfatisa cu e medida ta enfoca riba seguridad vial, proteccion di peatonnan y mantencion di orden publico.

Segun e publicacion, empresanan ainda por solicita permiso oficial, pero mientras cu no tin aprobacion y prueba cu e vehiculonan ta cumpli cu tur rekisito legal y tecnico, e huurmento no por continua.

Autoridadnan tambe a adverti cu despues di e termino di 14 dia, Gobierno por tuma accionnan manera multa administrativo, sancionnan financiero y otro medida di control contra operadornan cu sigui viola ley.

E advertencia oficialmente a wordo publica den Landscourant di Aruba dia 29 di mei 2026.