Vd Burg no ta mira motibo pa pidi disculpa: “Nos ta cuater pais igual den Reino”

ORANJESTAD – Durante un conferencia di prensa awe mainta cu periodista Tito Laclé di Noticiacla a participa tambe, secretario di estado hulandes Eric van der Burg a declara claramente cu no ta mira motibo pa pidi disculpa pa su reciente declaracionnan tocante relacion entre e paisnan den Reino Hulandes. Ta trata di e declaracionan recien haci pa e mandatario riba un entrevista cu e medio local Eanews. Esaki a pone cu partidonan di oposicion y sindicatonan ta exigi pa e mandatario hulandes disculpa su mes riba e declaracionan haci. Algo cu awor e mandatario a bisa di lo no haci. 

REACCION 

Segun Laclé, un carta formal di partido di oposicion y sindicatonan lo wordo presenta mas laat den dia na VNO cu e exigencia di disculpa. “Mi pregunta ta simpel. Mi mester compronde cu, despues di bo declaracion, bo persona no lo cumpli cu e demanda pa disculpa?” Laclé a pumtra. Den su contesta, Eric van der Burg a bisa cu representante di Hulanda lo ricibi e peticion y cu despues e   lo reacciona oficialmente. Sinembargo, e la enfatisa cu su posicion ta basa riba loke ta stipula den Statuto di Reino: “Nos tin cuater pais igual den Reino. Hulanda no ta mama cu tres yiu muhe. Nos ta cuatro ruman igual,” segun vd Burg. E la agrega cu desde 10-10-10 ningun di e cuater paisnan – Hulanda, Aruba, Corsou ni Sint Maarten – tin un posicion superior riba otro. Laclé despues a sigui insisti si vd Burg lo pidi disculpa si e demanda oficialmente wordo haci. Pero e secretario di estado a mantene firme den su posicion: “Mi no sa pakico mi mester pidi disculpa. Si mi bisa cu solo ta sali mainta y baha anochi, mi no mester pidi disculpa pa bisa un hecho,” asina vd Burg a declara. Segun e, hustamente e lo ta ofensivo si Hulanda wordo presenta como “,pais madre” y e otro paisnan como “yiu muhe”. “Door di bisa cu nos ta cuater pais igual, mi ta bisa exactamente loke ta correcto segun Statuto,” el a conclui, indicando cu pesey, e no mester disculpa su mes, pasobra e no a bisa nada incorecto. 

MANIFESTACION

Mientrastanto awe tardi, lo tin un marcha di protesta di partidonan di oposicion y un grupo di sindicato y esnan cu ta uni cu nan, unda cu e intencion ta pa marcha direccion oficina di VNO, representacion di gobierno Hulandes, unda cu lo entrega un carta cu e exigencia pa un disculpa di parti di e secretario di estado.