Gregory Elias, Sigmund Jansen y Percy Pinedo awe nochi ta den e programa Noticiacla LIVE

ORANJESTAD – Awe nochi, publico lo por sigui un entrevista exclusivo riba Noticiacla LIVE cu tres figura importante tras di Curacao North Sea Jazz Festival (CNSJF): Gregory Elias, fundador di Bon Intenshon y financier di e festival; Sigmund Jansen, director di Sales & Promotion; y Percy Pinedo, director di Media & Marketing. Mirando cu Elias, no ta duna entrevista casi, por considera esaki como algo unico y inusual. Loke tambe ta inusual ta cu mas cu un persona ta invitado den un solo programa. 

E programa lo cuminsa pa 8:30pm y lo wordo transmiti exclusivamente riba pagina di Facebook di Noticiacla LIVE y riba YouTube. E entrevista ta wordo conduci door di Tito Laclé, kende recientemente a bishita Corsou pa realiza e conversacionnan cu e organisadornan di e festival.

Durante e programa, televidentenan lo haya un mirada mas profundo den mundo tras di uno di e festivalnan musical mas importante den Caribe. Entre e temanan cu lo wordo trata tin e reto di trece artistanan internacional pa Corsou, con geopolítica y situacionnan mundial ta afecta contratacion di artista, y con CNSJF a logra mantene su reputacion internacional durante tantu aña.

Publico tambe por spera un dialogo tocante e impacto economico y turistico cu e festival tin riba Corsou y e region, ademas di futuro di entretenimiento y eventonan grandi den Caribe.

Durante e entrevista, lo papia tambe riba mercadeo, promocion internacional, y e importancia di media den posiciona Curacao North Sea Jazz Festival como un evento di clase mundial.

Segun Noticiacla LIVE, e entrevista lo contene diferente revelacion y historia cu normalmente publico no ta mira y scucha, convirtiendo esaki den un conversacion unico cu lo por wordo sigui solamente riba e plataforma di Noticiacla LIVE.