Aruba tabata anfitrion di cumbre internacional di para sports pa hende muher

ORANJESTAD - Gobierno di Aruba, hunto cu Aruba Paralympic Committee y Americas Paralympic Committee, a organiza exitosamente e cuarta edicion di “Women in Para Sports Americas Summit” na Aruba. E evento, cu a dura tres dia, a reuni mas di 50 lider muher di 29 pais den region Panamericano pa dialoga riba inclusion, liderazgo y desaroyo den para sports.

Minister di Deporte, Gerlien Croes, a participa activamente den diferente panelnan internacional tocante liderazgo femenino y cambio den deporte. Durante e cumbre, participantenan a comparti conocemento, fortalece conexionnan y discuti manera di crea mas oportunidad pa persona cu limitacion.

Pa prome biaha, e cumbre a habri su porta pa participacion di comunidad y tambe a inclui participacion di hombernan den e dialogo, promoviendo un enfoke mas inclusivo. Presencia di representante di Naciones Unidas y International Paralympic Committee a fortalece e importancia internacional di e evento.

Gobierno di Aruba a expresa orgullo pa e exito di e cumbre, destacando cu Aruba ta sigui comprometi cu inclusion, igualdad di oportunidad y desaroyo di para sports tanto local como internacionalmente.