Mas cu 20 aña despues: ainda tin esperanza pa haya resto di Natalee Holloway?

ARUBA – Mas cu 20 aña despues di desaparicion di Natalee Holloway na Aruba, pe regunta grandi ainda ta keda: lo por haya su resto algun dia? Asina un articulo investigativo di Eric Mercado riba e portal A&E Crime + Investigation ta raporta. Ta custumber cu rond di e fecha di e suseso (30 di mei) e caso ta re-aparece. Aunque Joran van der Sloot finalmente a confesa asesinato di e hoben americano, e cuerpo di Natalee nunca a wordo encontra.

Natalee Holloway, un hoben di 18 aña di Birmingham, Alabama, a bishita Aruba na mei 2005 hunto cu compañeronan di scol pa celebra su graduacion. Durante e ultimo anochi di nan estadia, e a sali for di nightclub Carlos’n Charlie’s hunto cu tres hoben local, incluyendo Joran van der Sloot. Despues di esey, Natalee nunca a wordo mira mas.

E desaparicion a provoca un di e buskedanan mas grandi den historia di Aruba. Polis, militar, FBI, voluntarionan y centenares di empleado publico a participa den investigacion y busqueda tanto na tera como den laman. Sin embargo, nunca a logra haya e hoben.

Joran van der Sloot y e rumanan Kalpoe a wordo deteni varios biaha den e caso, pero falta di prueba a complica e investigacion. Añanan despues, Van der Sloot a trata di extorciona famia Holloway, prometiendo informacion tocante e morto y ubicacion di e resto di Natalee na cambio di 250 mil dollar. Mas despues el a admite cu e informacion tabata falso.

Na 2023, como parti di un acuerdo hudicial den Merca, Van der Sloot finalmente a confesa cu e la mata Natalee despues cu e la a rechasa su acercamento sexual. Segun su declaracion, e la golpia Natalee brutalmente y despues hiba su cuerpo den laman.

Expertonan forensico ta bisa cu e posibilidad pa haya resto humano den oceano despues di tanto aña ta extremadamente chikito. Nan ta splica cu corrientenan, movemento di awa y proceso natural di descomposicion ta haci cu un cuerpo por desaparece completamente cu paso di tempo.

Un experto ambiental cu a participa anteriormente den buskedanan na Aruba a declara cu, si e cuerpo tabata cerca costa, probablemente ya lo tabata haya hopi aña pasa. Segun e experto, tin demasiada factor desconoci pa tin hopi esperanza di exito actualmente.

Aunke asina, algun cientificonan ta bisa cu tecnologia moderno manera investigacion cu ADN ambiental ainda por ofrece un tiki posibilidad den futuro. E metodo ta permiti analisa awa pa busca señalnan biologico humano, aunque expertonan admiti cu e posibilidad ta minimal.

Natalee Holloway oficialmente a wordo declara morto na 2012, pero e caso continua siendo un di e misterio y tragedianan criminal mas comenta den relacion cu Aruba y Merca.