Studiantenan na Hulanda a comparti retonan ora nan kier bolbe Aruba despues di estudio

DEN HAAG – Mas cu 30 studiante y hoben profesional Arubiano a participa den un encuentro cu Prome Minister Mike Eman na De Haagse Hogeschool den Hulanda, caminda a dialoga riba futuro di Aruba y e papel di hobenan den desaroyo di pais.

Durante e anochi, a intercambia pensamiento riba oportunidadnan profesional, crecimiento economico y diferente iniciativa cu Gobierno di Aruba ta desaroya pa fortalece conexion cu talento Arubiano na exterior.

Studiantenan cu a participa a describi e encuentro como interactivo, informativo y motivador. Nan a indica cu a papia abiertamente riba e reto cu hopi hoben ta enfrenta ora nan kier regresa Aruba despues di studia na Hulanda.

Gobierno tambe a comparti diferente proyecto strategico enfoca riba innovacion, educacion y desaroyo di un economia di conocemento na Aruba. Segun gobierno, mantene contacto cu hobenan Arubiano na exterior ta importante pa fortalece e siguiente generacion di profesionalnan y lidernan di Aruba.