Stadhuis di Den Haag a wordo evacua despues di menaza di bom

DEN HAAG – Stadhuis y biblioteca central di Den Haag a wordo evacua temporariamente despues cu un homber a bisa cu e tabatin un bom cu ne. Polis a interveni rapidamente y un team special di arresto a detene e sospechoso.

Segun polis, ta trata di un homber di 28 aña di Den Haag cu presuntamente a declara cu e tabatin explosivonan. Durante e operacion, polis a pone e homber kita gran parti di su paña pa controla si e no tabatin bom pega na su curpa. Finalmente, no a haya ningun explosivo.

E sospechoso tabata conoci serca polis anteriormente debi na comportamiento confuso. Tambe a controla su mochila, pero tampoco no a haya explosivonan aden.

E incidente a causa evacuacion di centenares di hende for di stadhuis y biblioteca. Empleadonan, bishitantenan y cliente den cafeterianan a wordo manda p’afor inmediatamente.

Zona rond di stadhuis y Spui a wordo cera completamente mientras cu polis, helicoptero policial y equipo anti-explosivo tabata presente na lugar. Tram y busnan tambe a wordo desviá durante e operacion.