SETAR y Telearuba ta uni pa transmiti weganan di Copa Mundial FIFA 2026

(ADVERTORIAL)

ORANJESTAD - E temporada tan gusta di futbol ta cla pa ranca sali y SETAR conhuntamente cu Telearuba ta cla pa transmiti tur e weganan di e Copa Mundial di FIFA 2026. 

Diaranson mainta den presencia di Minister di Telecomunicacion, Sr. Rene Herde, y Minister di Deporte, Sra. Gerlien Croes, SETAR a firma e acuerdo cu Telearuba pa transmision di e weganan di e Copa Mundial di FIFA 2026, cuminsando diahuebs 11 di juni 2026. E prome wega lo ta Mexico contra Sur Africa na Mexico City. E aña aki pa prome biaha e Copa Mundial ta tuma luga na tres pais, esta Mexico, Merca y Canada. 

Na Aruba e fanaticada di futbol ta grandi y hopi ta en espera di e weganan, specialmente cu participacion di e Blue Wave di nos hermana isla Corsou cu pa prome biaha ta participa den e Copa Mundial di FIFA. 

Como nos compania nacional di telecomunicacion, SETAR ta mira e importancia pa ta un partner oficial den e transmision di e Copa Mundial di FIFA 2026 y pa trece e ambiente di futbol pa nos isla. Nos ta invita pueblo di Aruba completo pa disfruta di e weganan cu lo ser transmiti pa Telearuba na canal 23.