Defensa hulandes a gasta mas cu 1,38 miyon euro na biahenan pa Aruba

DEN HAAG – Ministerio di Defensa di Hulanda a gasta na 2025 mas cu 6,6 miyon euro na biahenan aereo pa e partidonan caribeño di Reino. Cu esey, Defensa ta claramente e organizacion gubernamental cu mas a biaha dentro di Reino Hulandes.

For di e cifranan oficial di biahenan di trabou na exterior, ta mustra cu Corsou tabata e destinacion principal. Defensa a gasta solamente mas cu 4,5 miyon euro na bolonan for di Amsterdam pa Corsou. Ademas, mas cu 1,38 miyon euro a wordo gasta na biahenan pa Aruba, mas cu 323 mil euro pa Boneiru y mas cu 376 mil euro pa St. Maarten.

Cantidad di biahenan tabata hopi mas halto compara cu otro ministerionan. Defensa a registra 3.326 buelonan pa Corsou, 1.078 pa Aruba, 271 pa St. Maarten y 221 pa Boneiru.

Ademas di esey, e ministerio a gasta casi 399 mil euro na gastonan di hotel na Corsou y mas cu 257 mil euro na St. Maarten.

PRESENCIA MILITAR PERMANENTE

E cantidadnan halto ta relaciona cu e presencia militar permanente di Hulanda den Caribe. Esaki ta inclui rotacion di mariniernan y otro personal militar, apoyo na base naval Parera na Corsou, operacionnan di Coast Guard, ehecucionnan militar, transporte logistico y misionnan maritimo den region.

Loke ta destaca tambe ta cu Defensa relativamente ta uza poco businessclass compara cu cantidad total di biahenan. E mayoria di e gastonan ta consisti di ticketnan economico pa personal operacional.

E cifranan ta mustra tambe cu e rol geopolitico y di seguridad di e partidonan caribeño di Reino ta bira cada biaha mas importante. Durante e ultimo añanan, Hulanda a inverti mas den presencia militar y cooperacion den region, entre otro pa motibo di tensionnan rond di Venezuela, vigilancia di frontera, contrabando di droga y seguridad maritimo.