Ombudsman di Aruba a representa isla den reunion internacional di IOI na Corsou

ORANJESTAD – Ombudsman di Aruba, Jurima Bryson, recientemente a participa den e reunion internacional di Board of Directors di International Ombudsman Institute (IOI), cu a tuma luga na Corsou for di 10 te 13 di mei.

Durante e conferencia, Ombudsmannan di diferente paisnan a reuni pa discuti tema nan actual relaciona cu fortalecemento di institutonan di Ombudsman, cooperacion internacional, digitalisacion y uso di inteligencia artificial (AI) den servicio publico.

Participacion di Aruba a duna oportunidad pa comparte experiencia, intercambia “best practices” y representa interesnan di Aruba den discusionnan internacional tocante gobernacion, transparencia y proteccion legal di ciudadano nan.

Jurima Bryson, kende tambe ta ocupa e cargo di Director Regional pa Caribe y Latino America dentro di IOI, a participa adicionalmente den reunionnan regional tocante colaboracion, training y sosten pa institutonan di Ombudsman mas chikito den region.

Durante su estadia na Corsou, Bryson a felicita Ombudsman di Corsou, Keursly Concincion, y su team pa organizacion exitoso di e encuentro internacional.

Segun Ombudsman di Aruba, e reunion a brinda informacion valioso y insight tocante metodonan moderno y inovativo cu por contribui na mehoracion di servicio y cooperacion regional entre institutonan di Ombudsman.