Facultad di Derecho na Aruba cu coleccion nobo di leynan constitucional y administrativo

ORANJESTAD – Facultad di Derecho di Aruba lo presenta oficialmente dia 8 di juni un coleccion nobo di leynan di derecho constitucional y administrativo di Aruba. Durante e evento, e prome copia lo wordo entrega na Ombudsman Jurima Bryson.

Un aspecto importante di e coleccion nobo ta cu pa prome biaha a inclui Landsverordening Ombudsman, reconociendo oficialmente e rol creciente di Ombudsman den proteccion legal, transparencia y bon gobernacion na Aruba.

E publicacion ta reuni den un solo edicion hopi di e leynan mas importante di Aruba riba tema nan manera derecho constitucional, derecho administrativo, ley electoral, ley di inmigracion, nacionalidad, husticia y gobernacion. Segun Facultad, esaki lo facilita trabou di abogadonan, hueznan, funcionarionan, studiante nan y otro profesionalnan den sector legal.

Actualmente, derecho administrativo na Aruba ta considera di ta bastante fragmenta, paso Aruba no tin un ley general administrativo manera Hulanda. P’esey, e coleccion nobo ta busca crea mas claridad y accesibilidad den uso di diferente leynan y reglamentonan.