Laclé: Kier claridad riba reorganizacion di cuerpo policial

ORANJESTAD – Presidente nobo di sindicato di polis SPA, Lito Laclé, a declara durante un entrevista cu periodista Tito Laclé den e programa Noticiacla LIVE,  cu tin preocupacion serio tocante comunicacion interno y e direccion di reorganizacion dentro di Cuerpo Policial Aruba. Segun Laclé, actualmente tin un falta di conexion entre diferente nivelnan dentro di organizacion policial, algo cu segun dje ta afecta funcionamiento y bienestar di polisnan. “Practicamente no tin comunicacion. Tin un perdida completo di contacto,” Laclé a expresa.

SITUACION PERSONAL DI POLISNAN

El a splica cu e problema no ta solamente entre sindicato y mando policial, pero tambe den e manera cu ciertonan situacion personal di polisnan ta wordo maneha. Segun e, tin polisnan cu ta pasa door di problema mental, social of personal, pero hopi biaha falta coordinacion y seguimiento adecua. “Masha cos cu ta pasa cu polisnan, comando policial sa di dje. Tin biaha nan ta splica cu un polis ta pasando door di problema mental of social, pero si no tin conexion, no ta resolve esey,” Laclé a bisa.

ENFOKE RIBA SERVICIO Y COMUNICACION

Presidente di SPA a enfatisa cu durante su experiencia den diferente funcionnan, e semper a pone enfoke riba servicio, comunicacion y contacto cu coleganan. E la conta cu regularmente e ta bishita diferente departamento pa tende feedback y mira con servicio por wordo mehora. “Nos ta den un trabou di servicio y nos kier produci e mihor calidad posible,” e la declara. Durante e entrevista, Laclé a confirma cu mehoracion di comunicacion interno lo ta un di su prioridadnan principal como presidente di sindicato. “Correcto,” e la contesta ora cu a wordo puntra si miho comunicacion lo ta clave pa mehora e situacion dentro di cuerpo policial.

CARTA OFICIAL NA MANDO POLICIAL

Ademas, Laclé a anuncia cu e directiva nobo di SPA lo entrega dos carta oficial na mando policial dialuna awor. Segun e, e sindicato ta spera contesta dentro di dos siman. Un di e puntonan importante den e carta ta tocante infrastructura y ambiente di trabou di polisnan. Laclé a bisa cu a yega momento pa prepara y modernisa ciertonan facilidadnan policial pa polisnan por traha den mihor condicionnan y asina brinda un servicio mas eficiente tanto na comunidad como na turista. “Ta yega momento cu nos mester prepara e area pa nos por duna mihor servicio na turista, pero tambe pa polisnan traha den un mihor ambiente,” el a declara.

REORGANISACION POLICIAL

Otro punto importante cu SPA kier claridad riba dje, ta e reorganizacion di cuerpo policial. Segun Laclé, te ainda no tin suficiente informacion concreto tocante e direccion cu reorganizacion ta tuma. “Nos kier un contexto concreto tocante reorganizacion di cuerpo policial, paso te ainda nos no tin un contexto cla,” presidente di SPA a conclui.