Presencia di MEP na sesion di HOFA na KVK tabata problema pa minister

ORANJESTAD – Un sesion informativo tocante e ley di reino HOFA a termina den controversia awe despues cu dos miembro di Parlamento di MEP a presenta na un encuentro na Camara di Comercio (KVK), mientras cu Minister di Finansa, mr. Geoffrey Wever, a nenga di sigui cu su presentacion si e parlamentarionan tabata presente den sala. E situacion a provoca reaccion fuerte di tur banda: di e minister, di parlamentario Evelyn Wever-Croes y tambe di presidente di KVK, Diederik Kemmerling.

KVK 

Segun Kemmerling, e “townhall meeting” no tabata un evento organiza door di KVK, sino door di e minister mes. “E idea di e evento tabata pa e minister haci un presentacion na sector comercial, sin debate,” Kemmerling a splica. E la confirma cu dos miembro di Parlamento a yega na e encuentro y cu KVK a splica nan cu e sesion no tabata pa debate politico. “Finalmente nan mes a tuma e decision pa bay,” e presidente di KVK a sigui declara na Noticiacla.

MINISTER WEVER

Di su banda, minister Geoffrey Wever a bisa cu gobierno ta actualmente den un trayecto di duna diferente presentashon na gremionan comercial, sindicato y otro grupo den comunidad pa informa nan riba e aspecto tecnico, huridico y financiero di HOFA. “Nos ta organiza diferente sesion y presentashon. Siman pasa nos a haci uno na ATIA, awe na KVK, y despues nos lo sigui cu otro organizacionnan y sindicato,” Wever a declara. E minister a enfatisa cu e sesion no tabata poni pa bira un debate politico. “E no ta un debate politico, e ta un informatie sesie na sector priva,” e la bisa. Segun Wever, e invitacion tabata  specificamente pa sector comercial y no pa parlamentarionan. “Mi no a invita nan. Ami a organiza sesionnan aki unda nan no ta invita,” e la afirma.

Wever tambe a critica e ambiente den Parlamento, bisando cu e no ta apropia pa duna presentashon tecnico. “Ora bo papia den Parlamento, nan ta interumpi bo, nan ta grita y hasta insultabo. Esaki no ta un environment cu ami por duna un presentacion na nos sector comercial,” e la declara, añadiendo cu Parlamento ta e lugar apropia pa debate politico y cuestionamento di Parlamento.

 WEVER-CROES 

Parlamentario Evelyn Wever-Croes, sinembargo, a duna un version completamente diferente di loke a pasa. Segun e, Parlamento tabata invita door di KVK pa atende e encuentro. “Nos tabatey na tempo pero e minister no tabatin fin di yega,” e la bisa. Segun Wever-Croes, despues di mas o menos 15 minuut, ehecutivonan di KVK a informa nan cu e minister lo no bin si nan ( e parlamentarionan) permanece den e sala. “E motibo cu e la duna ta cu e no ta comfortable cu nos den sala, e no kier debate politico, e kier papia solamente cu e business community,” e parlamentario a declara. Segun  e, nan no tabata bay pa crea confrontacion politico, sino pa scucha e preocupacionnan y sentimiento di sector comercial tocante HOFA. “Nos no a bai pa un debate politico, nos a bai pa scucha kico ta e sentimento di sector comercial riba e ley di reino HOFA pa nos tene cuenta cu ne den nos trabou,” e la a bisa.

Wever-Croes a critica   e actitud di e minister fuertemente y a cuestiona si gobierno realmente tin confianza den e ley. “Mi ta lamenta e actitud aki di e minister cu ta mustra mas bien cu e minister ta insigur di su mes. Pasobra si HOFA ta asina bon, bo ta defende ‘sea Evelyn ta den sala of si e no ta den sala’,” e la declara. E parlamentario a agrega cu e  no tin miedo di sigui defende su posicion contra e actual propuesta di HOFA, cu of sin presencia di e minister.